ޗެއަރޕާސަންކަމަށް ރަނގަޅުވާނީ ރައްޔިތުންގެ މަޖިލީހުގެ މެންބަރެއް: ރައީސް ނަޝީދު
ވެރިކަންކުރާ ކޯލިޝަނުގެ މައި ޕާޓީގެ އެމްޑީޕީގެ ޗެއާޕާސަންގެ މަގާމު އެންމެ ފުރިހަމައަށް އަދާ ކުރެއްވޭނީ އެ މަޤާމަށް އަންނަ މީހަކީ ރައްޔިތުންގެ މަޖިލިސް މެންބަރަކަށް ވެގެން ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އަންނަ މަހުގެ 14 ވަނަ ދުވަހު ބާއްވާ އެމްޑީޕީގެ ޗެއާޕާސަން އިންތިހާބުގައި ވާދަކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއިލްއާއި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)އެވެ.
މި އިންތިޚާބުގައި ރައީސް ނަޝީދު ތާއީދު ކުރައްވާ ބޭފުޅެއް ރަސްމީ ސިފައެއްގައި ހާމަކުރައްވައިފައެއް ނުވެއެވެ. ނަމަވެސް އެމަނިކުފާނަށް ތާއީދުކުރައްވާ އެމްޑީޕީގެ އިސް ބޭފުޅުން އުޅުއްވަނީ އިންތިގެ ކެމްޕޭނު ޓީމުގައެވެ.
އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅުގައި އެގައުމުގެ ދޫރުދަރުޝަން ޗެނަލަށް ދެއްވި އިންޓަވިއުއެއްގައި ނަޝީދު ވިދާޅުވީ، ރައީސް އިބްރާހީމް މުޙައްމަދު ޞާލިޙް އަދި ރައީސް ނަޝީދު ވެސް ތާއީދު ކުރައްވާ ވަކި ކެނޑިޑޭޓެއް ހާމަކޮށްފައި ނުވާ ކަމަށެވެ. ނަމަވެސް، އެމަނިކުފާނު ވެސް އަދި ރައީސް ޞާލިޙް ވެސް އެ އިންތިހާބުގައި ބޭނުންވާ ގޮތް ސާފު ކަމަށް ވިދާޅުވިއެވެ.
ރައީސް ނަޝީދު ވިދާޅުވީ، މި އިންތިޚާބުގައި ތެދުވެރި، އަދި ސާފުތާހިރު ކެނޑިޑޭޓަކު ހޮވަން ޖެހޭ ކަމަށާއި އެންމެ ފުރިހަމައަށް ޗެއާޕާސަންގެ މަގާމު އަދާ ކުރެއްވޭނީ ރައްޔިތުންގެ މަޖިލީހުގެ މެމްބަރަކަށްކަމަށް ޤަބޫލުފުޅު ކުރައްވާ ކަމަށެވެ.
ޗެއާޕަސަންގެ އިންތިހާބުގެ ކެމްޕޭން ފޯރިގަދަވެފައިވާއިރު އެކަމާ ގުޅޭ ގޮތުން ސުވާލު ކުރުމުން ރައީސް ނަޝީދު ވިދާޅުވީ، އެއީ މައްސަލައެއް ނޫން ކަމަށާއި، ވާދަވެރިޔަސް ފެންނަނީ އެމްޑީޕީގެ ރޫޙް ކަމަށެވެ.
"ކޮންމެ ރަށެއް މިވަނީ ރީނދޫވެފައި. މުޅި ގައުމުގައި މިހާރު އޮތީ ރީނދޫ ކުލަ. އަދި މި ކެމްޕޭނުގެ ތެރެއިން އެހެން ކެމްޕޭނުތަކުގެ އަޑު ކަނޑުވައިލައިފިން" ނަޝީދު ވިދާޅުވިއެވެ.
ހޫނު ފެނަށް ވެއްޓިގެން އުޅޭ މީހަކު ކިޔާހާ އެއްޗެއް ނޫހުގަ ނުޖަހަބަލަ