ޚަބަރު

ބޮންޑޭގެ ރައްދު ފަޔާއަށް: ކޮރަޕްޓް ވަޒީރުން ލައިގެން ރައީސް ޞާލިޙަށް ދެވަނަ ދައުރެއް ނުލިބޭނެ!

ޢާއިޝަތު އަރީނާ ، ދެން އޮންލައިން

ރައީސް އިބްރާހީމް މުޙައްމަދު ޞާލިޙް ދެވަނަ ދައުރަކަށް ހޮވަން އެންމެން ވެސް ބޭނުންވާ ކަމަށާއި ނަމަވެސް ކޮރަޕްޓް ވަޒީރަކު ލައިގެން ރައީސް ޞާލިޙަށް 2023 ކާމިޔާބު ނުކުރެވޭނެ ކަމަށް މާފަންނު މެދު ދާއިރާގެ އެމްޑީޕީގެ މެމްބަރު އިބްރާހީމް ރަޝީދު (ބޮންޑޭ) ވިދާޅުވެއްޖެއެވެ.

Ads by STELCO

ބޮންޑޭ މިހެން ވިދާޅުވީ، ރައީސް އިބްރާހިމް މުހައްމަދު ޞާލިހް ދެވަނަ ދައުރަކަށް އިންތިހާބުކުރަން ބޭނުން ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވި ޚަބަރެއް ޓްވީޓް ކުރައްވަމުންނެވެ.

މި މަހު 14ވަނަ ދުވަހު އޮންނަ އެމްޑީޕީގެ ޗެއަރޕާސަން އިންތިޚާބަށް އެ މަނިކުފާނަށް ތާއީދު ހޯއްދެވުމަށް އަތޮޅުތަކަށް ކުރައްވާ ދަތުރުފުޅުގައި ރައީސް ޞާލިޙްގެ އުފަން ރަށް ޅ. ހިންނަވަރަށް ވަޑައިގެން އެރަށުގެ ސަޕޯޓަރުންނާ ބައްދަލު ކުރައްވައި ދެއްކެވި ވާހަކަފުޅުގައި ފަޔާ ވިދާޅުވީ ،އަންނަ އަހަރުގެ ރިޔާސީ އިންތިޚާބުގައި ރައީސް އިބްރާހިމް މުހައްމަދު ޞާލިޙް ވާދަކުރައްވައި ވެރިކަމުގެ ދެވަނަ ދައުރެއް އެމަނިކުފާނަށް ހޯއްދަވައިދެއްވަން ބޭނުންވާފުޅުވާ ކަމަށެވެ. އަދި މިކަން ކުރުމަށް ޕާޓީ ހިންގާލަން ޖެހޭ ކަމަށް ވިދާޅުވިއެވެ.

ވާދަވެރިކަން ބޮޑުވެފައިވާ މި އިންތިޚާބުގައި ބޮންޑޭ ތާއީދު ކުރައްވަނީ، އިންތިޚާބުގައި ރައީސް ނަޝީދު ތާއީދު ކުރައްވާ އިމްތިޔާޒް ފަހްމީއަށެވެ.

ފައްޔާޒަށް ރައްދު ދެއްވައި ބޮންޑޭ ކުރެއްވި ޓްވީޓެއްގައި ވިދާޅުވީ، ރައީސް ޞާލިޙް ދެވަނަ ދައުރަކަށް ހޮވަން އެންމެން ވެސް ބޭނުންވާ ކަމަށާއި ނަމަވެސް އެކަމަށް އޮތް ހުރަހަކީ ކޮރަޕްޓް ވަޒީރުން ކަމަށެވެ.

"އެންމެން ވެސް ރައީސް ޞާލިޙް ދެވަނަ ދައުރަކަށް ހޮވަން ބޭނުން. ނަމަވެސް ކޮރަޕްޓް ވަޒީރުން ލައިގެން ދެވަނަ ދައުރެއް ރައްޔިތުން ނުދޭނެ. ލަންކާގައި ވެސް ދިމާވެގެން އުޅެނީ މި މައްސަލަ!" ބޮންޑޭ ކުރެއްވި ޓްވީޓްގައި ވިދާޅުވިއެވެ.

  1. އެމްޑީޕީގެ ލީޑާރޝިޕްގައި ގިނައީ ކޮރަޕްޓު ސިޔާސީ ވަފާތެރި ކެހިވެރިން !