ރައީސް ނަޝީދާ ޒާތީ އެއްވެސް ކަމެއް ނެތް، އެކުގައި ތިބެވޭނެ: ފައްޔާޒު
ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ޒާތީ އެއްވެސް ކަމެއް ނޯންނާނެ ކަމަށް އެ ޕާޓީގެ ޗެއާޕާސަނަކަށް އަލަށް އިންތިހާބުވި އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު މިފަދައިން ވިދާޅުވީ އިންތިހާބުގެ ކާމިޔާބީއަށް ފަހު ރޭ ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ފައްޔާޒު ވިދާޅުވީ އިންތިހާބާ އެކު އެތެރޭގެ ވާދަވެރިކަން ބޮޑުވެފައިވީ ނަމަވެސް ޕާޓީ ރޫޅި ބައިބައިވެގެން ދާނެ ކަމަށް ގަބޫލު ނުކުރައްވާ ކަމަށެވެ. އަދި ރައީސް ނަޝީދާ އެކު މަސައްކަތް އަބަދުވެސް ވަރަށް ފަސޭހަ ކަމަށް ފައްޔާޒު ވިދާޅުވިއެވެ.
މީގެ އިތުރުން ފައްޔާޒު ވިދާޅުވީ “އަޅުގަނޑުގެ ޒާތީ އެއްވެސް ކަމެއް ނޯންނާނެ، އަޅުގަނޑު ދެކެނީ ރައީސް ނަޝީދުގެ ވެސް އެއްވެސް ޒާތީ ކަމެއް ނޯންނާނެ”ކަމަށެވެ.
ރައީސް ނަޝީދާ އެކު އަދިވެސް މަސައްކަތް ކުރެވޭނެ ކަމަށާއި އިންތިހާބަށް ފަހު ޕާޓީ އެކަތިގަނޑަކަށް ހެދޭނެ ކަމާމެދު އެއްވެސް ޝައްކެއް ނެތް ކަމަށް ފައްޔާޒު ވިދާޅުވިއެވެ. އަދި ނަތީޖާ ލިބުމުން މިހާރު އެންމެން ވެސް ގުޅިގެން މަސައްކަތް ކުރާނެ ކަމަށް އޭނާ ވިދާޅުވިއެވެ.
"އަޅުގަނޑު ކުޑަ ވެސް ޝައްކެއް ނުކުރަން އެކުގައި މަސައްކަތް ނުކުރެވޭނެ ކަމަކަށް. މިހާރު ނަތީޖާ ލިބިގަތީމަ އަޅުގަނޑާ އެކު އެ އެންމެން ވެސް ހަމަ މަސައްކަތް ކުރާނެ" ފައްޔާޒު ވިދާޅުވިއެވެ.
Ads by STO
