ހުރަވީ ބިލްޑިންގުގައި ހުރި ތަކެތި ނީލަންކިޔަނީ
ބައުވެގެން ތަޅައިލުމުގެ މަސައްކަތް ކުރަމުންދާ ހުރަވީ ބިލްޑިންގގައި ހުރި ތަކެތި ނީލަން ކިޔަން ނިންމައިފިއެވެ.
ނީލަން ކިޔުމަށް ހަމަޖެހިފައި ވަނީ، މިމަހުގެ 24ވަނަ ދުވަހުގެ ހެނދުނު 10:00ގައެވެ. ނީލަން އޮންނާނީ ހުރަވީ ބިލްޑިންގުގައެވެ.
ޕްލޭނިން މިނިސްޓްރީން ބުނީ އެ މިނިސްޓްރީގެ ބެލުމުގެ ދަށުގައި ހުރި ބައު ލަކުޑި ޑެކްފިލާ ފުނި، ބިއްލޫރި ލެއްވި ލަކުޑި ބޮޑު ދޮރުފަތް ،ލަކުޑި ފަތި ފުނި، ލަކުޑި ބޮޑު ދޮރުފަތް، ލަކުޑި ސިޑި، ކަރަންޓު ނަރު ޖަންބޯ ފުނި، ބިއްލޫރި ލެއްވި ކުޑަ ދޮރުފަތް ، ދަގަނޑު ޗެންޗޭނު، ރަހަ ބިއްލޫރި ގަނޑު ބޮޑު ފްރޭމްއާ އެކު، ނީލަމުގައި ވިއްކައިލާން ނިންމައިފައިވާ ކަމަށެވެ.
ހުރަވީ ބިލްޑިންގަކީ މީގެ 35 އަހަރު ކުރިން ބިނާކޮށްފައިވާ އިމާރާތެކެވެ. މި އިމާރާތް ބައުވެ، އިމާރާތުގެ ބައެއް ބައިތައް މީގެ ކުރިން ވެއްޓިފައި ވެއެވެ. މި އިމާރާތަކީ މީގެ ކުރިން ގިނަ އޮފީސްތަކެއް ހިންގަމުން އައި ތަނެކެވެ.
