ހުރަސްތައް ހުރި ނަމަވެސް މާޔޫސްވުމެއް ނެތް: މާލޭ ސިޓީ ކައުންސިލް
ހާސިލުކުރަން އަމާޒު ހިފި އެތައް ކަމަކަށް ބޮޑެތި ހުރަސްތައް ކުރިމަތިވެފައިވާ ކަމަށާއި ހުރަސްތައް ކުރިމަތީގައި ހުރި ނަމަވެސް މާޔޫސްވުމެއް ނެތްކަމަށް މާލޭ ސިޓީ ކައުންސިލުން ބުނެފިއެވެ.
މާލޭ ސިޓީ ކައުންސިލުން ބުނީ ލާމަރުކަޒީ ގާނޫނުގައި ބުނާ ގިނަ ކަންކަން ފަހިވެފައި ނެތުމުގެ ސަބަބުން އެ ކައުންސިލުން ހާސިލުކުރަން އަމާޒު ހިފި އެތައް ކަމަކަށް ބޮޑެތި ހުރަސްތައް ކުރިމަތިވެފައިވާ ކަމަށެވެ. އަދި އެ ހުރަސްތައް ގިރާކުރެވޭނީ ލާމަރުކަޒީ ގާނޫނު ތަންދޭ ހަގީގީ ބާރުވެރިކަން އެ ކައުންސިލަށް ލިބިގެން ކަމަށެވެ. އަދި ރައްޔިތުންގެ ލާބަޔާއި މަންފާއަށް ރެޔާދުވާލު ކުރަމުންދާ މަސައްކަތަށް ސަރުކާރުގެ ފުރިހަމަ އެއްބާރުލުމާއި ސަރުކާރުގެ އިދާރާތަކުން ދޭންޖެހޭ ހުއްދަތައް ދީ, މާލީ ގޮތުންނާއި ވަސީލަތްތަކުގެ ގޮތުން ލާޒިމުކުރާ ކަންކަން ހަމަޖައްސައިދީގެން ކަމަށެވެ.
ސިޓީ ކައުންސިލުން ބުނީ ހުރަސްތައް ކުރިމަތީގައި ހުރި ނަމަވެސް މާޔޫސްވުމެއް ނެތް ކަމަށެވެ. އަދި އެ ކައުންސިލުން އޮތީ ރައްޔިތުންގެ އުންމީދުތައް ހާސިލުކޮށްދިނުމުގައި ސަރުކާރާ އެއްބާރުލައި، ސަރުކާރާ މަޝްވަރާކޮށް، ރައްޔިތުންގެ މުހުތާދުތައް ފުއްދައިދިނުން އަވަސްކުރުމުގެ މުހިންމުކަން ސަރުކާރަށް ވިސްނައިދިނުމުގައި ހަމަ ކޮންމެ ދުވަހަކުމެ ގަދައަޅައި މަސައްކަތްކުރާ ގޮތަށް ކަމަށެވެ.
