ސިޔާސީ ރޭހުގައި ދުރުރާސްތާ ކާމިޔާބެއް ހޯދޭނީ އަމިއްލަ މަސްލަހަތަށްވުރެ, ދީން އިސްކޮށްގެން: އިމްރާން
ސިޔާސީ ރޭހުގައި ދުރުރާސްތާ ކާމިޔާބެއް ހޯދޭނީ ދީނާއި ޤައުމާއި ރައްޔިތުންގެ މަސްލަހަތު އިސްކުރާ މީހަކަށް ނުވަތަ ބަޔަކަށްކަމަށް ޢަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން ޢަބްދުﷲ ވިދާޅުވެއްޖެއެވެ.
އަރައިގެން އައި އިރާއެކު އިމްރާން މިއަދު ކުރެއްވި ޓުވީޓުގައި ވިދާޅުވީ ސިޔާސީ ރޭހުގައި ދުރުރާސްތާ ކާމިޔާބެއް ހޯދޭނީ އަމިއްލަ މަސްލަހަތަށްވުރެ, ދީނާއި, ޤައުމާއި, ރައްޔިތުންގެ މަސްލަހަތު އިސްކުރާ މީހަކަށް ނުވަތަ ބަޔަކަށް ކަމަށެވެ.
އޭގެ އިތުރުން އެއްޗެއް ވިދާޅެއްނުވެއެވެ. ފަހަކަށް އައިސް އިމްރާން ގެންދަވަނީ ދީނާ ގުޅުވައި މިފަދަ ޓުވީޓުތައް ކުރައްވަމުންނެވެ. އެހެންކަމުން އޭނާއަށް ފާޑުކިޔުން ވެސް ވަނީ އަމާޒުވެފައެވެ.
ދާދިފަހުން އިމްރާން ކުރެއްވި ޓުވީޓެއްގައި ވިދާޅުވީ ޢަދާލަތު ޕާޓީ އުފެއްދީ ރާއްޖޭގައި ފަނޑުވަމުންދިޔަ އިސްލާމްދީނުގެ މަތިވެރި އުސޫލުތައް ނެގެހެއްޓުމަށް ކަމަށާއި, އެ ޕާޓީ ދެމި އޮންނާނީ އެ ޒިންމާ އަދާކުރުމުގައި ކަމަށެވެ. އެކަމާ ގުޅިގެން ފާޑުކިޔުން އަމާޒުވުމުން ވިދާޅުވީ ވޭތުވެދިޔަ ތިން އަހަރާ ބަޔަށް ބެލިޔަސް ނުވަތަ 2005 އިން ފެށިގެން މިހާތަނަށް ބެލިޔަސް ޢަދާލަތުގެ ޢިލްމުވެރިންނަށްވުރެ ދީނަށް ޚިދުމަތްކުރި ޕާޓީއެއް ނުވަތަ ޖަމާޢަތެއް މި ރާއްޖެއަކު ނެތް ކަމަށެވެ.
