''ވެރިކަމުގެ ޢިއްޒަތް'' ވަރަށް ފަސޭހައިން އިންސާނާގެ މަގު އޮޅުވައިލާނެ: ޢުމަރު
ވެރިކަމުގެ ޢިއްޒަތާއި ބާރާއި ފައިސާއަކީ ވަރަށް ފަސޭހައިން އިންސާނާގެ މަގު އޮޅުވައިލާ އެއްޗެތިކަމަށް ކުރީގެ ހޯމް މިނިސްޓަރު ޢުމަރު ނަޞީރު ވިދާޅުވެއްޖެއެވެ.
2023 ވަނަ އަހަރު ބާއްވާ ރިޔާސީ އިންތިޚާބުގައި ވާދަކުރައްވަން ނިންމަވައި ކެމްޕޭން ފަށްޓަވާފައިވާ ޢުމަރު މިހެން ވިދާޅުވީ ފޭސްބުކްގައި ކުރެއްވި ޕޯސްޓެއްގައެވެ.
ޢުމަރު ވިދާޅުވީ ވެރިކަން ކުރަންވީ އާޚިރަތަށްޓަކައި ކަމަށާއި ދުނިޔެ ހޯދަން ވެރިކަން ކުރާނަމަ ގެއްލެނިވެގެން ހިނގައިދާނެ ކަމަށެވެ. އަދި ވެރިކަމުގެ ޢިއްޒަތާއި ބާރާއި ފައިސާއަކީ ވަރަށް ފަސޭހައިން އިންސާނާގެ މަގު އޮޅުވައިލާ އެއްޗެތި ކަމަށާއި, ވޭތުވި ތިން ވެރިކަން ވެސް ރަނގަޅަށް ފެށުމަށްފަހު ނުބައި ގޯޅިއެޅީ މި ސަބަބުތަކަށް ޓަކައި ކަމަށެވެ.
''މި ނުރައްކަލުން ވެރިންނަށް ސަލާމަތްވެވޭނެ ހަމައެކަނި ގޮތަކީ، އެމީހުން ނަމާދު ޤާއިމް ކުރުމާއި, ޤުރުއާން ކިޔެވުން އިތުރުކޮށް އިލާހީ ގުޅުން ވަރުގަދަ ކުރުން.''
ޢުމަރު ވިދާޅުވީ ވެރިކަން ހިންގުމުގެ ފުރިހަމަ ބާރާއި, މަޖްލިސް މެޖޯރިޓީ ވިއްސިވިހާލިވެގެންދާ މަންޒަރު ތަކުރާރުވެގެން ދިޔަތަން މި ފެނުނީ ދުނިޔެއަށް ޓަކައި ވެރިކަން ކުރަން ފެށުމުން ކަމަށެވެ.
