ދައުރުވަމުންދާ ފޮޓޯތަކުން ފެންނަނީ މިނިސްޓަރު އަމީން އިންނަވާ ކޮޓަރިކޮޅެއް ނޫން: ހެލްތު މިނިސްޓްރީ
ހެލްތު މިނިސްޓަރު އަބްދުﷲ އަމީންގެ އޮފީސް ކޮޓަރިކޮޅު ކަމަށް ބުނެ ދައުރުކުރާ ފޮޓޯތަކުން ފެންނަނީ އެކޮޓަރިކޮޅު ނޫންކަމަށް ހެލްތު މިނިސްޓްރީން ބުނެފިއެވެ.
މިނިސްޓަރު އަމީން އިންނަވާ ކޮޓަރިކޮޅު ކަމަށް ބުނެ މީސް މީޑީއާގައި މިއަދު ވަނީ ފޮޓޯތަކެއް އާންމު ވެފައެވެ.
މިކަމާ ގުޅިގެން ހެލްތު މިނިސްޓްރީން ބުނީ އެފޮޓޯތަކުން ފެންނަނީ އެ މިނިސްޓްރީގެ ކޮންފަރެންސް ރޫމްކަމަށެވެ. އެ ކޮންފަރެންސް ރޫމްގައި މިނިސްޓްރީގެ އިވެންޓްތައް ބޭއްވުމުގެ އިތުރުން އެހެނިހެން ފަރާތްތަކުގެ އިވެންޓްތައް ބޭއްވުމަށް ކުއްޔަށް ދޫކުރުމަށް ނިންމާފައިވާކަމަށް ވެސް އެ މިނިސްޓްރީން ބުނެއެވެ.
އަދި އެތަން ކުއްޔަށް ދޫކޮށްގެން ލިބޭ ފައިސާ ޚަރަދުކުރުމަށް ނިންމާފައިވަނީ ޢާންމު ސިއްޙަތުގެ ދާއިރާއިން މަސައްކަތް ކުރުމަށް ކަމަށާ، އެފައިސާ ހެލްތު ފަންޑަށް ޖަމާކުރުމަށް ނިންމާފައިވާކަމަށް ވެސް ހެލްތު މިނިސްޓްރީން ބުނެއެވެ.
ފޮޓޯތަކުން ފެންނަ ހެލްތު މިނިސްޓްރީގެ ކޮނަފަރެންސް ރޫމަށް ނަންދީފައިވަނީ "މޫމިނާ ޙަލީމް މާލަމް"ގެ ނަމުންނެވެ. މޫމިނާ ޙަލީމަކީ ރާއްޖޭގެ ފުރަތަމަ އަންހެން ހެލްތު މިނިސްޓަރެވެ.
މިކޮންފަރެންސް ރޫމް ހެދުމުގެ ބޭނުމަކީ ހެލްތު މިނިސްޓްރީ އަކީ ގިނަ އިވެންޓްތަކެއް ބާއްވާ ތަނަކަށްވެފައި، އެފަދަ އިވެންޓްތައް އެމިނިސްޓްރީން ބޭއްވުމަށް ބޮޑެތި ޚަރަދުތަކެއް ކުރަންޖެހޭތީ، އެޚަރަދުތައް ކުޑަކުރުމުގެ ބޭނުމުގައި ކަމަށްވެސް އެ މިނިސްޓްރީން ބުނެއެވެ. އަދި މިކަމުން އިވެންޓްތައް ބާއްވަން ކުރާ ހޭދަ ވަރަށް ބޮޑުތަން ކުޑަ ވެގެން ދާނެ ކަމަށް ވެސް ހެލްތު މިނިސްޓްރީން ބުނެފައިވެއެވެ.
