ތިލަ މާލޭ ބްރިޖްގެ އަމަލީ މަސައްކަތް މިއަދު ފައްޓަވާދެއްވަނީ
ތިލަމާލެ ބްރިޖްގެ އަމަލީ މަސައްކަތް ފައްޓަވާ، ފުރަތަމަ ތަނބުގެ މަސައްކަތް މިއަދު ރައީސް އިބްރާޙީމް މުޙައްމަދު ޞާލިޙް މިއަދު އިފްތިތާހްކޮށްދެއްވާނެއެވެ.
ރައީސް އިބްރާހީމް މުޙައްމަދު ޞާލިޙް މިވަގުތު ހުންނެވީ އިންޑިއާގެ ބޮޑު ވަޒީރު ނަރެންދްރަ މޯދީއާއެކު، އިންޑިއާގެ ނިއުޑެއްލީގެ ހައިދްރަބާދް ހައުސްގައެވެ.
މާލެ، ވިލިމާލެ، ތިލަފުށި އަދި ގުޅީފަޅު ގުޅާލާ ގްރޭޓާ މާލެ ބްރިޖު ޕްރޮޖެކްޓްގެ ދަށުން މި ރަސްމިއްޔާތުގެ ތެރެއިން މާލެ އާއި ވިލިމާލެއާ ދެމެދު އަޅާ ބްރިޖުގެ ފުރަތަމަ ތަނބުގެ މަސައްކަތް ފައްޓަވާ ދެއްވާނެއެވެ.
މި މަޝްރޫއައަކީ އިންޑިއާގެ 100 މިލިއަން ޑޮލަރުގެ ހިލޭ އެހީއާއެކު ކުރިޔަށް ގެންދާ ޕްރޮޖެކްޓެކެވެ. ޕްރޮޖެކްޓް ހިންގުމަށް އިންޑިއާގެ އެކްޒިމް ބޭންކުން 400 މިލިއަން ޑޮލަރުގެ ލައިން އޮފް ކްރެޑިޓެއް ވަނީ ދީފައެވެ.
މި މަޝްރޫއުގެ އެއްބަސްވުމުގައި އިންޑިއާގެ އެފްކޮންސް އިންފްރާސްޓްރަކްޗާ ލިމިޓެޑާއި ދިވެހި ސަރުކާރާ ދެމެދު މިދިޔަ އަހަރު އެއްބަސްވުމުގައި ސޮއިކޮށްފައި ވާއިރު، މިހާރު ކުރިޔަށްދަނީ ބްރިޖު އަޅާ ސަރަހައްދުގެ ބިމުގެ ހާލަތު ދެނެގަތުމަށްޓަކާ ޖިއޯޓެކްނިކަލް ސާވޭގެ މަސައްކަތެވެ.
ރައީސް ޞާލިޙްގެ ވެރިކަމުގައި އިންޑިއާއާއި ރާއްޖެއާ އޮތް ގުޅުން ވަނީ ވަރަށް ބޮޑަށް ރަނގަޅު ވެފައެވެ. މިގޮތުން އިންޑިއާއިން ދަނީ 260 މިލިއަން ރޫފިޔާގެ ހިލޭ އެހީއާއެކު ރާއްޖޭގައި 45 މަޝްރޫއަކަށް ކުރިޔަށް ގެންދަމުންނެވެ. މި 45 މަޝްރޫއުގެ ތެރެއިން 17 މަޝްރޫއެއް މިހާރު ވަނީ ނިމި އިފްތިތާހުކޮށްފައެވެ. މި މަޝްރޫޢުތަކުގައި ފަތުރުވެރިކަމާއި، ދެމެހެއްޓެނިވި ތަރައްޤީއާއި، ތަޢުލީމާއި، މަސްވެރިކަމާއި، ޞިއްޙީ ޚިދުމަތް، ލޯކަލް އިންފްރާސްޓްރަކްޗަރ، ކުޅިވަރު އަދި ޒުވާނުންގެ ތަރައްޤީ ހިމެނޭ ގޮތަށް އިޖްތިމާޢީ އިޤްތިޞާދީ ތަރައްޤީގެ ތަފާތު ދާއިރާތައް ހިމެނެއެވެ.
