ސަސްޕެންޝަނުގައި ބަހައްޓައި ބައި މިލިއަން ރުފިޔާ ދިނުމަށްފަހު ސާޖެންޓް އެޓް އާމްސް ވަކިކޮށްފި
މުސާރަ ލިބޭ ގޮތަށް ސަސްޕެންޝަނުގައި ހުންނަވާތާ ދޮޅު އަހަރު ފަހުން ރައްޔިތުން މަޖިލީހުގެ ސާޖެންޓް އެޓް އާމްސް މުޙައްމަދު ޙަލީމް މަޤާމުން ވަކިކޮށްފިއެވެ.
އޭނާ މަޤާމުން ވަކިކުރަން ރައްޔިތުންގެ މަޖިލީހުގެ މިއަދުގެ ޖަލްސާގައި ނެގި ވޯޓުގައި ވަކިކުރަން ފެންނަކަމަށް 25 މެންބަރުން ވޯޓު ދެއްވިއެވެ. ވަކި ކޮޅަކަށް ވޯޓު ނުދެއްވައި އެއް މެންބަރަކު އިންނެވިއިރު, ނުފެންނަކަމަށް އެއްވެސް މެންބަރަކު ވޯޓު ދެއްވައިފައެއްނުވެއެވެ.
މަޖިލީހުން ބަލަމުންދާ މައްސަލައަކާ ގުޅިގެން ޙަލީމް ސަސްޕެންޑްކުރީ މިދިޔަ އަހަރު ޖެނުއަރީގައެވެ. ނަމަވެސް މިހާތަނަށް އެ މައްސަލައާ ބެހޭ ތަފްސީލެއް މަޖިލީހުން ހާމައެއް ނުކުރެއެވެ. މަޢުލޫމާތު ލިބޭ ގޮތުން ޙަލީމް ސަސްޕެންޑްކުރީ މަޖިލީހުގެ ރައީސާއި, ނައިބު ރައީސްގެ ކޮޓަރި ބަގުކުރަން އުޅުނުކަމުގެ ތުހުމަތުގައެވެ.
މަޖިލީހުގެ ސާޖެންޓް އެޓް އާމްސް މަޤާމު އުފެއްދީ 2013 ވަނަ އަހަރުއެވެ. އެ މަޤާމު އުފެއްދީއްސުރެ އެ މަޤާމު އަދާކުރައްވަމުން ގެންދަވަނީ ޙަލީމެވެ.
Ads by STO
