އެމްއެމްޕީއާރުސީން ދޫކޮށްފައިވާ ރަށްތަކާއި ފަޅުތަކަކީ ފަތުރުވެރިކަމަށް ކުރިމަތިވާ އެންމެ ބޮޑު ގޮންޖެހުން: ރައީސް ޞާލިޙް
ފަތުރުވެރިކަމުގެ ޞިނާޢަތަށް ކުރިމަތިވި އެންމެ ބޮޑު ގޮންޖެހުމަކީ، އެމްއެމްޕީއާރްސީ މެދުވެރިކޮށް، މީގެ ހައެއްކަ އަހަރު ކުރިން ދޫކޮށްފައި ހުރި ބައެއް ރަށްތަކާއި ފަޅުތައް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ޓޫރިޒަމްގެ ރަން އަހަރާއި ޤައުމީ ފަތުރުވެރިކަމުގެ ދުވަސް ފާހަގަކުރުމަށް ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ، ފަތުރުވެރިކަމަށް ދޫކޮށްފައިހުރި ބައެއް ތަންތަން، އަހަރުތަކެއް ވެގެން ދިޔައިރު ވެސް ތަރައްޤީނުކުރެވި އޮތުމުން ދައުލަތަށް ބޮޑެތި ގެއްލުންތަކެއް ލިބިފައިވާ ކަމަށެވެ.
“ފަތުރުވެރިކަމަށް ދޫކޮށްފައި ހުރި ބައެއް ތަންތަން، އަހަރުތަކެއް ވެގެން ދިޔައިރު ވެސް ތަރައްޤީ ނުކުރެވި އޮތުމަކީ ދިމާވި އެންމެ ބޮޑު އެއް ގޮންޖެހުން. ޚާއްޞަކޮށް އެމް.އެމް.ޕީ.އާރް.ސީ މެދުވެރިކޮށް، މީގެ ހައެއްކަ އަހަރު ކުރިން ދޫކޮށްފައި ހުރި ބައެއް ރަށްތަކާއި ފަޅުތައް” ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ “އެތައް ބިލިއަން ޑޮލަރެއްގެ އަގުހުރި ރަށްތަކާއި ފަޅުތައް، ބަޔަކަށް ވިއްކައިލި އިރު، އެ ތަންތަނުގެ އަގުވެސް ދައުލަތައް ނުލިބޭ” ކަމަށާއި އެ ތަންތަނުން ދައުލަތަށް ލިބުނު ގެއްލުމުގެ ބަދަލު ހޯދުމުގެ މަސައްކަތް، ޝަރުޢީ ކޯޓުތައް މެދުވެރިކޮށް ކުރަމުން އަންނަ ކަމަށެވެ.
ފަތުރުވެރިކަމުގެ ގޮންޖެހުންތަކަށް އަލިއަޅުއްވާލައްވާ ރައީސް ވަނީ، ކޮވިޑް-19ގެ ސަބަބުން ކުރިމަތިވި ދަތިތައް ފާހަގަކުރައްވައިފައެވެ. އެކަމުގެ ސަބަބުން ތަރައްޤީއަށްޓަކައި ކުރަން ރާވާފައި ހުރި އެތައް ކަމެއް މަޑުޖައްސައިލަން ޖެހުނު ކަމަށާއި، އެންމެ ބޮޑު ގެއްލުމެއް ލިބިފައިވަނީ ރާއްޖޭގެ ރިސޯޓްތަކަށް ކަމަށް ރައީސް ވިދާޅުވިއެވެ.
