ދިވެހިންނަށް ފަހިވާގޮތަށް ފަތުރުވެރިކަމުގެ ސިނާއަތް ބަދަލުވާންޖެހޭ: ނާޒިމް
ދިވެހިންނަށް ފަހިވާގޮތަށް ފަތުރުވެރިކަމުގެ ސިނާއަތް ބަދަލުވާން ޖެހޭކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް ކާނަލް ރިޓަޔާޑް މުޙައްމަދު ނާޒިމް ވިދާޅުވެއްޖެއެވެ.
ނާޒިމް އެހެން ވިދާޅުވީ ޤައުމީ ފަތުރުވެރިކަމުގެ ދުވަހާ ގުޅިގެން ކުރެއްވި ޓުވީޓެއްގައެވެ.
ޤައުމީ ފަތުރުވެރިކަމުގެ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ރަސްމީ ޖަލްސާގައި ދެއްކެވި ވާހަކަފުޅުގައި ރައީސް އިބްރާހީމް މުޙައްމަދު ޞާލިޙް ވިދާޅުވީ މިދިޔަ މަހުގެ ނިޔަލަށް ރާއްޖޭގައި 166 ރިސޯޓު އެބަ އޮތް ކަމަށާއި, އަދި ފަތުރުވެރިކަމުގެ ދާއިރާއިން އެތައް ހާސް ވަޒީފާއެއް އަލަށް އުފެއްދިއްޖެ ކަމަށެވެ.
ނާޒިމް މިއަދު ކުރެއްވި ޓުވީޓުގައި ވަނީ ރާއްޖޭގައި ހިނގަހިނގާ އޮތް 166 ރިސޯޓު އޮތްއިރު ދިވެހިންގެ ފުރިހަމަ ބާރު ހިނގާ އަދި ދިވެހިންގެ ކިތައް ރިސޯޓު އެބައޮތްތޯ ސުވާލު ކުރައްވައިފައެވެ. އެ ސުވާލު ކުރައްވައި އޭނާ ވަނީ ދިވެހިންނަށް ފަހިވާގޮތަށް ސިނާއަތް ބަދަލުވާން ޖެހޭކަމަށް ވިދާޅުވެފައެވެ.
ރައީސްގެ ވާހަކަފުޅާ ގުޅިގެން އެމްއެންޕީގެ ނައިބު ރައީސް އަޙްމަދު ޝަރީފް ވިދާޅުވީ ހިސާބުތައް ވިދާޅުވިއިރު ރިސޯޓުތަކާއި، ގެސްޓް ހައުސްތަކުގައި ވަޒީފާ އަދާކުރާ ދިވެހިންންގެ އަދަދު ވެސް ވިދާޅުވިނަމަ ރަނގަޅުވީސް ކަމަށެވެ.
''ގެސްޓްހައުސްތަކުން އުފެދުނީ ބަންގްލަދޭޝް މީހުންގެ ވަޒީފާ، ރިސޯޓުތަކުގައި އުފެދުނީ އޭޝިއާ އަދި ޔޫރަޕް މީހުންގެ ވަޒީފާ، އެ ތަންތަން ހެދީ ބޭރުގެ ކުންފުނިތަކުން'' އޭނާ ވިދާޅުވިއެވެ.
Ads by STO
