ފެންބޮޑުވުމާއި ގުޅިގެން އާއްމުވި ބަލިތަކުގައި ޕާކިސްތާނުގައި 1،700 މަރު
މޫސުމީ ވިއްސާރައިގެ ސަބަބުން ޕާކިސްތާނުގެ އުތުރާއި ދެކުނުގައި ފެންބޮޑުވެފައިވާ ސަރަޙައްދުތަކުގައި ފެނުގެ ޒަރިއްޔާއިން ފެތުރޭ ބަލިތައް ޢާންމުވެ، ގިނަ އަދަދެއްގެ ބަޔަކު މަރުވެއްޖެއެވެ. ފެންބޮޑުވުމާ ގުޅިގެން ކުރިމަތިވި އެކި ހާދިސާތަކުގައި އެ ޤައުމުގައި މަރުވި މީހުންގެ އަދަދު މިހާރު ވަނީ 1,700 އަށްވުރެ މައްޗަށް އަރާފައެވެ.
ފެންބޮޑުވެފައިވާ ސަރަޙައްދުތަކުގެ ފެންގަނޑު މުޅިން ހިނދެން ހަ މަހެއްހާ ދުވަސް ހޭދަވާނެ ކަމަށް ބެލެވެއެވެ. ބައެއް ސަރަޙައްދުތަކުގެ އަވަށްތަކުގައި 10އާއި 12 ފޫޓުގެ އުސްމިނަށް ފެންބޮޑުވެފައިވެއެވެ. މި ކަމާ ގުޅިގެން ފެނުގެ ޒަރީޢާއިން ފެތުރޭ ނުރައްކާތެރި ބަލިތައް ކަމުގައިވާ ބޭރަށް ހިންގުމާއި މެލޭރިޔާއާއި ޓައިފޮއިޑާއި ޑެންގީގެ އިތުރުން ހަމާއި ލޮލަށް ޖެހޭ ބަލިތައް ވަނީ ޢާންމުވެފައެވެ.
ފެނުގެ ޒަރީޢާއިން ފެތުރޭ ބަލިތަކުގައި މިހާތަނަށް 340އަށްވުރެ ގިނަ މީހުން މަރުވެފައިވާ ކަމުގައި ޕާކިސްތާނުގެ ޞިއްޙީ އޮފިޝަލުން ބުނެއެވެ. އެންމެ ގިނަ މީހުންނަށް ޖެހިފައި ވަނީ މަދިރީގެ ޒަރީޢާއިން ފެތުރޭ ނުރައްކާތެރި ބައްޔެއް ކަމުގައިވާ މެލޭރިޔާއެވެ.
މޫސުމީ ވިއްސާރައިގައި ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ސިންދު ޕުރޮވިންސަށެވެ. އެ ޕުރޮވިންސުގައި މެލޭރިޔާ ޖެހިފައިވާ މީހުންގެ އަދަދު 17,280 އަށްވުރެ މައްޗަށް އަރާފައިވާ ކަމުގައި ޞިއްޙީ އޮފިޝަލުން ބުނެއެވެ. ފެންބޮޑުވުމާ ގުޅިގެން އެކި ބަލިތައް ތަޙައްމުލު ކުރަމުންދާ މީހުންނަށް ފަރުވާ ކުރުމަށް އިތުރު 5,000 އަށްވުރެ ގިނަ ޞިއްޙީ ޚިދުމަތްތެރިން ހޯދުމަށް ސިންދު ޕުރޮވިންސުގެ ސަރުކާރުން ދަނީ މަސައްކަތް ކުރަމުންނެވެ.
ފެނުގެ ޒަރީޢާއިން ފެތުރޭ ބަލިތައް ތަޙައްމުލު ކުރަމުންދާ މީހުންނަށް ފަރުވާ ދިނުމަށް މަސައްކަތް ކުރާ ޢަބްދުالله ޝާހު އިންސްޓިޓިއުޓް އޮފް ހެލްތް ސައިންސްގެ ޑޮކްޓަރުން ބުނީ، ދުވާލެއްގެ މައްޗަށް 300އާއި 400އާ ދެމެދު އަދަދަކަށް މީހުންނަށް އެ ތަނުން ފަރުވާ ދޭ ކަމުގައެވެ. އޭގެ ތެރޭގައި ގިނައީ މެލޭރިޔާއާއި ބޭރަށް ހިންގުމަށް ފަރުވާ ހޯދާ ކުޑަކުދިން ކަމުގައި ޑޮކްޓަރުން ބުނެއެވެ.
އޮގަސްޓާއި ސެޕްޓެންބަރު މަހު ޕާކިސްތާނުގެ ސަރަޙައްދުތަކަށް ކުރި މޫސުމީ ވިއްސާރައިގެ ސަބަބުން 33 މިލިޔަނަށް ވުރެ ގިނަ މީހުން ވަނީ ހާލުގައި ޖެހިފައެވެ. އެތަކެއް ސަތޭކަ ހާސް ބަޔަކު. މި ވަގުތު ދިރިއުޅެމުން ދަނީ ވަގުތީ ހިޔާތަކުގައެވެ.
ކުރިއަށް އޮތް ފިނި މޫސުމުގައި ކުރިން ފެންގަނޑު ނުހިނދިއްޖެ ނަމަ، ހާލުގައި ޖެހިފައިވާ މީހުންނަށް އިތުރު ތަކުލީފުތަކާ ކުރިމަތިލާން ޖެހޭ ކަމުގައި ޕާކިސްތާނުން ބުނެއެވެ. އަދި، ވަގުތީ ހިޔާތަކުގައި ދިރިއުޅޭ މީހުންނަށް ނޭވާލުމުގެ ނިޒާމުގެ ބަލިތަކާއި ނިއުމޯނިޔާ ފަދަ ނުރައްކާތެރި ބަލިތަކާ ކުރިމަތިލާން ޖެހޭނެ ކަމުގައި ޕާކިސްތާނުގެ ޞިއްޙީ އޮފިޝަލުން އިންޒާރު ކުރެއެވެ.
