ހޮރިޒޯންއިން މަސް ކިރުމަށްފަހު، މަސްވެރިންނަށް ފައިސާ ނުދޭތާ 2 މަސް!
ހޮރިޒޯން ފިޝަރީސްއިން މަސް ކިރުމަށްފަހު މަސްވެރިންނަށް ފައިސާ ނުދޭތާ 2 މަސް ވެފައިވާ މައްސަލައެއް ފެންމަތިވެއްޖެއެވެ.
ލ. މާމެންދޫ، މަސްދުވެލި ދޯނީގެ ކޭޝިއަރ، އަބްދުالله ޝަރީފް “ދެން”އަށް މަޢުލޫމާތު ދެއްވަމުން ވިދާޅުވީ އެ ދޯނިން ބާނާފައިވާ 60 ޓަނުގެ މަހަށް ލިބެންޖެހޭ ރުފިޔާ ހޮރިޒޯން ފިޝަރީސްއިން ދީފައިނުވާ ކަމަށާއި މިކަމާ ގުޅިގެން ވަރަށް ބޮޑު ދަތިތަކާ ކުރިމަތިލާން ޖެހިފައިވާ ކަމަށެވެ.
ޝަރީފް ވިދާޅުވީ މީގެ ކުރިންވެސް މަސް ކިރަނީ ހޮރިޒޯންއިން ކަމަށާއި ކުދި ކުދި މައްސަލަތައް ދިމާވި ނަމަވެސް މިއީ ފައިސާ ނުދީ މިހައި ގިނަ ދުވަސްވި ފުރަތަމަ ފަހަރު ކަމަށެވެ. ފައިސާ ނުދީ ލަސްވާ ސަބަބުވެސް މަސްވެރިންނަށް ހާމަކޮށްފައިނުވާ ކަމަށާއި ހޮރިޒޯންއިން މަސްވެރިންނަށް ދޭން ޖެހޭ ފައިސާގެ އަދަދު 950،000ރުފިޔާއަށް އަރާ ކަމަށް ޝަރީފް ވިދާޅުވިއެވެ.
“60 ޓަނުގެ މަހަށް ލިބެން ޖެހޭ ރުފިޔާ ނުލިބި ވަނީ. އެ ފަރާތުން ދޭން ޖެހޭ 950،000 ރުފިޔާ ނުލިބި ވަނީ. 200،000 ރުފިޔާ ވަނީ ލިބިފަ. މަސްވެރިންނަށް އަނގާފަ ވަނީ ކޮންމެ ބިލަކަށް ތިން ހަފްތާ ފަހުން ލާރި ޖަމާވާނެއޭ” ޝަރީފް ވިދާޅުވިއެވެ.
ޝަރީފް ވިދާޅުވީ ލ. އަތޮޅުގެ ގިނަ ދޯނިތަކުން މަސް ކިރަނީ ހޮރިޒޯންއިން ކަމަށާއި އިތުރު 6 ދޯންޏަކަށް ވެސް ހޮރިޒޯންއިން ފައިސާ ނުދީވާ ކަމަށް މަޢުލޫމާތު ލިބިފައިވާ ކަމަށެވެ. މިކަމުގެ ސަބަބުން އާންމު ދިރިއުޅުމުގައި ކުރަން ޖެހޭ ހަރަދުތައް ކުރުމަށް ދަތިތަކާ ކުރިމަތިލާން ޖެހިފައިވާ ކަމަށް ޝަރީފް ވިދާޅުވިއެވެ.
“މިގޮތަށް ރުފިޔާ ނުލިބި ވާތީ ވަރަށް ގިނަ ދަތިތަކާ ކުރިމަތިލާން ޖެހޭ. އަޅުގަނޑުމެންނަކީ ސަރުކާރު މުވައްޒަފުން ނޫން ވީމަ މަސްވެރިކަން ކޮށްގެން ލިބޭ އެއްޗަކުން ކައި ބޮއެ ފީތައް ދައްކާ ދަރިންގެ ކަންތައްތައް ކުރަން ޖެހެނީ. އަޅުގަނޑުމެންގެ ޒަރޫރީ ގިނަ ބޭނުންތައް ނުފުދިފަ މި ތިބެންޖެހެނީ” ޝަރީފް ވިދާޅުވިއެވެ.
މީގެ އިތުރުން، މާމެންދޫގެ އާބަދީގެ 3 ބައިކުޅަ ދެބަޔަކީ މަސްވެރިކަން ކުރާ އާއިލާތައް ކަމަށާއި އެ އާއިލާތަކަށްވެސް މިކަމުގެ ސަބަބުން މަހުން މަހަށް ދައްކަން ޖެހޭ ބިލުތައް ނުދެއްކިފައިވާ ކަމަށް ޝަރީފް ވިދާޅުވިއެވެ.
Ads by STO
