ހަށިވިއްކާ ތަންތަން ބަންދު ނުކުރެވެނީ ޤާނޫނު ނެތިގެނެއް ނޫން: ޑރ.ޝަހީމް
ރާއްޖޭގައި ހިންގަމުންދާ ހަށި ވިއްކާ ހުރިހާ ތަނެއް ވަގުތުން ވަގުތަށް ބަންދުކުރެވޭނެ ޤާނޫނުތައް އެބަހުރި ކަމަށާއި, ނަމަވެސް އެކަން ނުވެގެން އުޅެނީ ޤާނޫނު ނެތިގެންނެއް ނޫންކަމަށް ކުރީގެ އިސްލާމިކް މިނިސްޓަރު ޑރ.މުޙައްމަދު ޝަހީމް ޢަލީ ސަޢީދު މިއަދު ވިދާޅުވެއްޖެއެވެ.
ބަދުއަޚްލާޤީ އަމަލުތައް ގިނަވުމަކީ މިއަދު ރާއްޖެއަށް ކުރިމަތިވެފައިވާ އެންމެ ބޮޑު ނުރައްކާ ކަމަށާއި, އެކަން ހުއްޓުވަން ޤާނޫނުތައް ޒަމާނަށް ފައްތަންޖެހޭކަމަށް ހޯމް މިނިސްޓަރު އިމްރާން ވިދާޅުވުމާ ގުޅިގެން ޝަހީމް ވިދާޅުވީ ރާއްޖޭގައި އެކަމަށް ހެދިފައި ހުރި ޤާނޫނުތަކަކީ ''އޯލްޑް'' ޤާނޫނުތަކެއް ނޫން ކަމަށެވެ. އަދި ޤާނޫނުލްޢުޤޫބާތަކީ ވެސް ވަރަށް ފަހުގެ އެއްޗެއް ކަމަށާއި, އިޖުތިމާޢީ ފޭރާން ވީދިގެންދަނީ ޤާނޫނު ނެތިގެންނެއް ނޫންކަމަށް ޝަހީމް ވިދާޅުވިއެވެ.
ޝަހީމް ވިދާޅުވި ގޮތުގައި މައްސަލައަކީ ޤާނޫނު ތަންފީޒު ނުވުމާއި ތަންފީޒުކުރުމުގައި ތަފާތު ކުުރުން ބޮޑުވުމެވެ.
ޝަހީމް އިތުރަށް ވިދާޅުވީ ރާއްޖޭގައި ހިންގަމުންދާ ހަށި ވިއްކާ ހުރިހާ ތަނެއް ވަގުތުން ވަގުތަށް ބަންދުކުރެވޭނެ ޤާނޫނުތައް އެބަހުރި ކަމަށެވެ. ނަމަވެސް އެކަން ނުވެގެން އުޅެނީ ޤާނޫނު ނެތިގެންނެއް ނޫންކަމަށް ވެސް ޝަހީމް ވިދާޅުވިއެވެ.
ރާއްޖޭގައި ހަށިވިއްކާ ތަންތަން ގިނަވެ, ވަރަށް ފާޅުކަންބޮޑު ގޮތެއްގައި ދަނީ އެކަން ކުރަމުންނެވެ.
