މަސްވެރިންގެ ޝަކުވާތައް އިއްވުމަށް ޕީޕީއެމުން މިއަދު މަސްމާރުކޭޓު ސަރަހައްދަށް އެއްވަނީ
ސަރުކާރުން މަސްވެރިންނާ ގުޅޭ ވައުދުތައް ފުއްދަމުން ނުދާތީ މިއަދު ހަވީރު މަސް މާރުކޭޓު ސަރަހައްދުގައި އިހުތިޖާޖު ކުރަން ނިންމައިފައިވާ ކަމަށް އިދިކޮޅު ޕީޕީއެމް/ޕީއެންސީން ބުނެފިއެވެ.
އިދިކޮޅު ކޯލިޝަނުން ވިދާޅުވީ މަސްވެރިންގެ އަޑު ސަރުކާރަށް އިއްވައިދިނުމަށް ކުރިޔަށްގެންދާ ހަރަކާތް ބޭއްވުމަށް ހަމަޖެހިފައިވަނީ މިއަދު ހަވީރު 16:00 ގައި މަސް މާރުކޭޓު ސަރަހައްދުގައި ކަމަށެވެ.
އެ ކޯލިޝަނުން ވަނީ ވީހާވެސް ގިނަބަޔަކު ބައިވެރިވުމަށް ގޮވައިލައްވާފައެވެ. މި ހަރަކާތުގައި އިދިކޮޅު ކޯލިޝަންގެ ގިނަ މެމްބަރުން ބައިވެރިވުމަށް ވަނީ ހަމަޖެހިފައެވެ.
އިދިކޮޅު ކޯލިޝަނުން އިއްޔެ ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޕީޕީއެމް ސެނެޓަރ އަދި ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވީ ސަރުކާރު ޖަވާބުދާރީ ކުރުވުމަށް ގާނޫނުގެ ތެރެއިން ސިޔާސީ ޕާޓީތަކަށް ލިބިދީފައި އޮތް ހައްގެއް ބޭނުން ކުރާނެ ކަމަށެވެ. އަދި މި ސަރުކާރުން ވީ އެއްވެސް ވައުދެއް ފުއްދާފައި ނުވާ ކަމަށްވެސް އިސްމާއިލް ވިދާޅުވިއެވެ.
Ads by STO
