ކުރިއަށް އޮތް ފަސް ދުވަހު ވެސް ރާއްޖޭގެ މޫސުން ގޯސްވާނެ: މެޓް އޮފީސް
ކުރިއަށް އޮތް ފަސް ދުވަހު ވެސް ރާއްޖެއަށް ވިއްސާރަ ކުރާނެކަމަށް ލަފާކުރެވޭކަމަށް މެޓް އޮފީހުން މިއަދު ބުނެފިއެވެ.
މެޓް އޮފީހުން ބުނީ އަންނަ އާދިއްތަ ދުވަހާ ހަމައަށް ރާއްޖޭގެ ހުރިހާ ހިސާބަކަށް ވެސް ވިއްސާރަކުރާނެ ކަމަށާއި, ވިލާގަނޑުގައި ވައިބާރުވެ ކަނޑުތައް ގަދަވުން އެކަށީގެންވާ ކަމަށެވެ.
ވައިޖެހޭނީ ހުޅަނގާއި ހުޅަނގު އުތުރުން ގަޑިއަކު 13 މޭލާ 23 މޭލާ ދެމެދުގެ ބާރުމިނުގައި ކަމަށާއި ވިލާގަނޑުގައި ގަޑިއަކު 45 މޭލުގެ ބާރުމިނުގައި ވައިޖެހުން އެކަށީގެންވާކަމަށް ވެސް މެޓް އޮފީހުން ބުންޏެވެ.
މެޓް އޮފީހުން ބުނި ގޮތުގައި ވޭތުވެދިޔަ 24 ގަޑިއިރު އެންމެ ބޯކޮށް ވާރޭވެހިފައިވާކަމަށް ރެކޯޑް ކުރެވިފައިވަނީ އައްޑޫ ސިޓީ ހުޅުމީދުއަށެވެ. އެ ރަށަށް ވަނީ 58.9 މިލިމީޓަރުގެ ވާރޭ ވެހިފައެވެ. ދެން އެންމެ ގިނައިން ވާރޭވެހިފައިވަނީ ލ.ކައްދުއަށެވެ. އެ ރަށަށް ވަނީ 51.4 މިލިމީޓަރުގެ ވާރޭ ވެހިފައެވެ.
މޫސުން ގޯސްވުމުގެ ސަބަބުން މިހާރު ވެސް ބައެއް އަތޮޅުތަކަށް ވަނީ ހުދު ސަމާލު ނެރެފައެވެ.
