ބޭސް ފިހާރައިގައި އަންހެނަކަށް ޖިންސީ ގޯނާ ކުރި މީހާ ހައްޔަރުކޮށްފި

މާލޭގެ ބޭސް ފިހާރައަކަށް ދިޔަ ދިވެހި އަންހެނަކަށް ޖިންސީ ގޯނާ ކުރި ކަމަށް ބުނާ މައްސަލައާ ގުޅިގެން މީހަކު ހައްޔަރުކޮށްފިއެވެ.

Ads by STELCO

އެ މައްސަލަ ފުލުހުންނަށް ހުށަހަޅާފައި ވަނީ ރޭގެ ވަގުތެއްގައެވެ. އެ މައްސަލައާ ގުޅިގެން ބިދޭސީއަކު ވަނީ ހައްޔަރުކޮށްފައެވެ. އެއީ 50 އަހަރުގެ ފިރިހެނެއް ކަމަށް ފުލުހުން ވިދާޅުވިއެވެ.

ފުލުހުން ވިދާޅުވީ، އޭނާގެ ބަންދާއި މެދު ގޮތެއް ނިންމުމަށް މިއަދު ކޯޓަށް ހާޒިރު ކުރުމުން، ބަންދުގައި ބަހައްޓައިގެން މައްސަލަ ކުރިއަށް ގެންދިއުމަށް 10 ދުވަސް ޖަހާފައި ވާ ކަމަށެވެ.

އެނގިފައިވާ ގޮތުގައި، މިކަން ހިނގާފައި ވަނީ ޖަނަވަރީ މަގުގައި ހުންނަ ފާމަސީއެއްގައެވެ. އަދި އަންހެން މީހާ އަށް ޖިންސީ ގޯނާ ކުރި ކަމަށް ވަނީ އެ ފިހާރައިގެ ސޭޓަކަށް ހުރި އިންޑިއާ ފިރިހެނެކެވެ.