މާ ކަނޑު މެދަށް ދޯންޏެއް ހުއްޓި އޮޔާދަނީ, އަޑިއަށް ގޮސްދާނެކަމުގެ ބިރު!
ކާށިދޫ ކަނޑުން އިންޖީނު ހުއްޓުނު ކަންނެލި ދޯންޏެއް އޮޔާދާތީ ސިފައިން ހަރަކާތްތެރިވާން ފަށައިފިއެވެ.
އެމްއެންޑީއެފުން ބުނީ 06 މީހުންނާއެކު މިއަދު މާލެއިން ފުރައިގެން ރ.އަތޮޅަށް ދަތުރުކުރަމުން ދަނިކޮށް، ކާށިދޫގެ ހުޅަނގުން 12 ނޯޓިކަލް މޭލް ބޭރުން އިންޖީނު ހުއްޓުނީ "ހައިރާތު" ނަމަކަށް ކިޔާ ދޯންޏެއް ކަމަށެވެ.
އެ ދޯނީގެ އިންޖީނު ހުއްޓިގެން އުޅޭކަމުގެ މަޢުލޫމާތު އެމްއެންޑީއެފް ކޯސްޓްގާޑު ސެކަންޑް ސްކޮޑްރަންއަށް ލިބުނީ މިއަދު 11:01 ހާއިރުއެވެ.
އެ ވަގުތު އެ ހިސާބުން ދަތުރުކުރި "ދަ ފިއުލް 08" ނަމަކަށް ކިޔާ ތެޔޮ ބޯޓެއް ދޯންޏާ ކައިރިކޮށް ކަފުޖަހަން މަސައްކަތްކުރި ކަމަށާއި, ނަމަވެސް ކަނޑުގަދަކަމުން ކަފު ނުޖެހިގެން، އެ ދޯންޏާ ކައިރިކޮށް ފަހުން ދެ ފަރާތުން ވާ އައްސާފައިވާކަމުގެ މަޢުލޫމާތު ލިބިފައިވާކަމަށް އެމްއެންޑީއެފުން ބުންޏެވެ. އަދި ކަނޑުގަދަކަމުން ނުދުއްވޭ ކަމާއި ދޯނީގައި އައްސާފައިވާ ވާ ކަނޑައިގެން ގޮސްފިނަމަ ދޯނި އަޑިއަށް ގޮސްދާނެކަމަށް މަޢުލޫމާތު ލިބިފައިވާކަމަށް ވެސް އެމްއެންޑީއެފުން ބުންޏެވެ.
''މި މަޢުލޫމާތު ލިބުމާއެކު، އެމްއެންޑީއެފް ކޯސްޓްގާޑު ސެކަންޑް ސްކޮޑްރަންގެ ފާސްޓް އިންޓަސެޕްޓަރ ކްރާފްޓް "ހަކުރާ" ލޯންޗު ވަނީ އެ ސަރަހައްދަށް ގޮސް އެހީތެރިކަން ފޯރުކޮށްދޭން ފަށާފައި.''
އެމްއެންޑީއެފުން ބުނީ ދޯނީގެ ވެރި ފަރާތާ ގުޅިގެން، އެ ދޯނި ކަފުޖެހުމަށް ކާށިދޫން މިއަދު 14:00 ހާއިރު އިތުރު އުޅަނދެއް އެ ސަރަހައްދަށް ފުރުވާލައިފައިވާ ކަމަށެވެ.
