އަލިފާނުގެ ހާދިސާގައި ފިހުނު މީހާ ވޯޑަށް ބަދަލުކޮށްފި
މ.ނިރުފެހިގޭގައި ހިނގި އަލިފާނުގެ ހާދިސާގައި ވަރަށް ބޮޑަށް ފިހިގެން އައިޖީއެމްއެޗުގެ އައިސީޔޫގައި ވެންޓިލޭޓަރުގެ އެހީގައި ފަރުވާދެމުންދިޔަ މީހާ ވޯޑަށް ބަދަލުކޮށްފިއެވެ.
މި މަހުގެ 09 ވަނަ ދުވަހުގެރޭ ހިނގި އަލިފާނުގެ ހާދިސާގައި ޖުމްލަ 10 މީހުން މަރުވިއެވެ. އޭގެތެރޭގައި ހިމެނެނީ އިންޑިއާގެ 08 މީހުންނާއި ބަންގްލަދޭޝްގެ ދެ މީހުންނެވެ.
މީގެ އިތުރުން އަލިފާނުގެ ހާދިސާގައި ވަރަށް ބޮޑަށް ފިހުނު މީހަކަށް އައިޖީއެމްއެޗުގެ އައިސީޔޫގައި ވެންޓިލޭޓަރުގެ އެހީގައި އައީ ފަރުވާ ދެމުންނެވެ.
އައިޖީއެމްއެޗުން މިއަދު ބުނީ އޭނާ ވެންޓިލޭޓަރުން ނަގާފައިވާ ކަމަށާއި މިހާރު ވޯޑަށް ބަދަލުކޮށްފައިވާ ކަމަށެވެ. އަދި ކުރިއަށްވުރެ އޭނާގެ ހާލު ރަނގަޅުކަމަށް ވެސް އައިޖީއެމްއެޗުން ބުންޏެވެ.
މި ހާދިސާގައި މަރުވި މީހުންގެ ހަށިތައް މިހާރު ވަނީ އެ މީހުންގެ ޤައުމަށް ފޮނުވައިލާފައެވެ. މަރުވި މީހުންގެތެރޭގައި ހިމެނެނީ ހަ ފިރިހެނުންނާއި ހަތަރު އަންހެނުންނެވެ.
Ads by STO
