ރާއްޖޭގެ ބޯޑަރު ހުޅުވިފަހުން ފުރަތަމަ ފަހަރަށް ކްރޫޒް ލައިނަރއެއް ރާއްޖެ އަތުވެއްޖެ
ކޮވިޑުގެ ހާލަތުގައި ރާއްޖޭގެ ބޯޑަރުތައް ބަންދުކުރުމަށްފަހު، ބޯޑަރު ހުޅުވާލިފަހުން ފުރަތަމަ ފަހަރަށް ކްރޫޒް ލައިނަރއެއް ރާއްޖެ އަތުވެއްޖެއެވެ.
މޯލްޑިވްސް އެސޯސިއޭޝަން އޮފް ޔޮޓް އޭޖެންޓްސް (މާޔާ) އިން ބުނީ ކޮވިޑް-19ގެ ލޮކްޑައުންއަށްފަހު ބޯޑަރު ހުޅުވާލި ފަހުން ރާއްޖެއަށް ފުރަތަމަ ކްރޫޒް ލައިނާ ފަތިހު 05:30 ގައި ރާއްޖެ އައިސްފައިވާ ކަމަށެވެ.
އިތުރު ކްރޫޒް ލައިނާވެސް މި އަހަރުގެ ކުރިއަށް ހުރި ދުވަސްތަކުގައި ރާއްޖެ އަންނަން ތާވަލުކޮށްފައިވާ ކަމަށާއި މިކަން ކުރެވިފައިވަނީ ހުރިހާ މެންބަރުންގެ މަސައްކަތަކާއެކު ކަމަށް މާޔާއިން ބުންޏެވެ.
ކޮވިޑަށްފަހު ފުރަތަމަ ކްރޫޒް ލައިނަރ ރާއްޖެ އައިސްފައިވާއިރު ރާއްޖެއަށް ޒިއާރަތްކުރާ ފަތުރުވެރިންގެ އަދަދުވެސް ދުވަހެއް ދުވަހަކަށް ދަނީ އިތުރުވަމުންނެވެ. އެގޮތުން މިއަހަރުގެ މިހާތަނަށް ޖުމްލަ 1،421،907 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. މިއީ މިދިޔަ އަހަރާ އަޅާ ބަލާއިރު 99،970ގެ ކުރިއެރުމެކެވެ.
މިއަހަރު އެންމެ ގިނައިން ފަތުރުވެރިން ޒިޔާރަތްކޮށްފައި ވަނީ އިންޑިއާ އިންނެވެ. އެ ޤައުމުން 199،219 ފަތުރުވެރިން އައިސްފައިވާއިރު ދެވަނައަށް އެންމެ ގިނަ ފަތުރުވެރިން އައިސްފައިވަނީ ރަޝިއާއިންނެވެ. އެ ޤައުމުން އައިސްފައިވަނީ 174،601 ފަތުރުވެރިންނެވެ.
