ފެންނަނީ ރާއްޖެ ވަރަށް އެމްޑީޕީކޮށް ހިންގަވަމުން ގެންދަވާތަން: އަނދުން ޙުސެއިން
ފެނިގެންދަނީ ސަރުކާރުން ދިވެހިރާއްޖެ ވަރަށް އެމްޑީޕީކޮށް ހިންގަވަމުން ގެންދަވާ ތަންކަމަށް ހެންވޭރު ދެކުނު ދާއިރާގެ މެންބަރު ޙުސައިން ޝަހީމް (އަނދުން ހުސެން) މިއަދު ވިދާޅުވެއްޖެއެވެ.
ރައްޔިތުން މަޖިލީހުގެ ޖަލްސާގައި ހުސެން ވިދާޅުވީ ރައްޔިތުންނަށް ތާހިރު ދިރިއުޅުމެއް ހޯދައިދޭނެ ވާހަކައާއި ހަމަހަމަކަމާއެކު ހުރިހާ ރައްޔިތުންނަށް ތަރައްޤީ ގެންނަންޖެހޭ ވާހަކައާއި ރައްޔިތުން ނަޖިސް ފެނުން ފެންވަރަން ޖެހިގެން ނުވާނެ ކަމުގެ ވާހަކައާއި ރައްޔިތުން ރަށު ބަންދުން ވީއްލެންޖެހޭނެކަމުގެ ވާހަކަ ދެއްކީ އެމްޑީޕީން ކަމަށެވެ. ނަމަވެސް މިއަދު ސަރުކާރުން އެކަންކަން ކޮށްދެއްވާތީ އެކަމަށް ހަޖޫޖެހުމަކީ ބޮޑުވަރުކަމަށް އޭނާ ވިދާޅުވިއެވެ.
ޙުސެއިން ވިދާޅުވީ އެމްޑީޕީއަކީ ދެ މީހެއްގެ ޖީބުގައި އޮންނަ ކްރެޑިޓް ކާޑެއް ނޫން ކަމަށާއި އެއީ އެތައް ބައެއްގެ އުންމީދު ކަމަށެވެ.
ބަނގުރޫޓް, ބަނގުރޫޓް, ބަނގުރޫޓް. މި ނަން ކިޔާ ދިވެހިންނަށް ރީތިވެއްޖިއްޔާ ގެދޮރަށް ވެސް ކިޔާނެ. އަލަތު ކައިވެންޏަށް ވެސް އެ ނަންކިޔާނެ. ލިބޭ ދަރިންނަށް ވެސް އެ ނަން ކިޔާނެ. މާތްﷲ ގެ މިންވަރުފުޅާއި ވާގިފުޅުން ދިވެހި ރައްޔިތުންނަށް އެފަދަ ކަމެއް ކުރިމަތިނުވާނެ.
ރާއްޖެ ބަނގުރޫޓުވާއިރު މަޖިލީހުގެ ރިޔާސަތުގައި އިންނެވުމަކީ ލަދުވެތިކަމެއް ކަމަށް ވިދާޅުވެ ދާދިފަހުން މަޖިލީހުގެ ރައީސް ދެއްކެވި ވާހަކަފުޅަށް ޢިޝާރަތް ކުރައްވަމުން ޙުސެއިން ވިދާޅުވިއެވެ.
ޙުސެއން އިތުރަށް ވިދާޅުވީ ކޮންމެ ކަމެއްގެ ހައްލަކީ ބަރުލަމާނީ ނިޒާމަކަށް ރާއްޖެ ފުރޮޅައިލުމަށް ރެފަރެންޑަމެއް ކަމަށްވާނަމަ ބަޖެޓަށް އަތްޖައްސަވާނެ މަދު މެންބަރުން ކޮޅެއް ތިއްބަވާނެ ކަމަށެވެ. އަދި ރިޔާސަތުން މިކަމާ ދޭތެރޭގައި ދެކެވަޑައިގަންނަވާ ގޮތް ވެސް ވަރަށް ޕޮޒިޓިވްވާނެ ކަމަށެވެ.
