އުރީދޫ ފަން ރަންގައި ބައިވެރިވާން އަދި ވެސް މިއޮތީ ޗާންސެއް!
ޓެލެކޮމިއުނިކޭޝަން ކުންފުނި އުރީދޫން އިންތިޒާމް ކޮށްގެން މިއަހަރު ބޭއްވުމަށް ހަމަޖެހިފައިވާ އުރީދޫ ފަން ރަންގައި ބައިވެރިވާން ބޭނުންވެ، ރެޖިސްޓަރ ނުކުރެވުނު ފަރާތްތަކަށް އުރީދޫން އިތުރު ޗާންސެއް ދީފިއެވެ.
އުރީދޫން މިއަދު ކުރި ޓްވީޓެއްގައި ބުނެފައިވަނީ އެފަރާތުގެ ޓްވީޓް ރީޓްވީޓްކޮށް، އަދި ރައްޓެއްސަކު ޓެގްކޮށްގެން މިއަދުން ފެށިގެން ކޮންމެ ދުވަހަކު ނަސީބުވެރި ފަރާތަކަށް އުރީދޫ ފަން ރަންގެ ކިޓް ދެވޭނެ ކަމަށެވެ. މި ޕްރޮމޯޝަން މިއަދުން ފެށިގެން 20 ޑިސެންބަރާއި ހަމައަށް ކުރިޔަށްދެއެވެ.
6 އަހަރުން މަތީގެ ހުރިހާ ފަރާތްތަކަށް މި ދުވުމުގައި ބައިވެރިވުމުގެ ފުރުސަތު ހުޅުވާލައިފައިވާއިރު ތަފާތު ހަރަކާތްތަކެއް ހިމެނޭ 5 ކިލޯމީޓަރުގެ މި ކުރު ދުވުމަކީ އަލަށް ދުވާ ފަރާތްތަކާއި އާއްމުކޮށް ދުވާ ފަރާތްތަކަށް ވެސް ބައިވެރިވުމަށް މަޖާވާނެ ދުވުމެކެވެ. އުރީދޫ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުމެވެ. އުރީދޫ ފަން ރަންގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި ކުލަގައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްދާނެއެވެ.
މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފައި، ޖޮގްކޮށްފައި، ދުވެފައި ނޫނީ ނަށަމުން ވެސް މި ދުވުން ނިންމިދާނެއެވެ.
