ޗައިނާގައި ކޮވިޑް-19 ޓެސްޓް ކިޓްތަކުގެ އަގު ވަރަށް ބޮޑަށް އުފުލިއްޖެ
ޗައިނާގެ އެކި ކަންކޮޅުތަކުގައި ކޮވިޑް-19 ފެތުރުން ކަންބޮޑުވާ މިންވަރަކަށް އިތުރުވެ، ބޭސްފިހާރަތަކުން ހުމާއި ރޯގާ ބޭސް ހުސްވާން ފަށައިފިއެވެ. ޗައިނާގައި ހަލުވިކަމާ އެކު ކޮވިޑް-19 ފެތުރެން ފަށާފައި ވަނީ ބަލި ފެތުރުން ކޮންޓްރޯލް ކުރުމަށް އަޅާފައިވާ ހަރުކަށި ފިޔަވަޅުތަކަށް ލުއިދޭން ފެށުމުންނެވެ. ޗައިނާގައި އަމަލު ކުރަމުންދިޔަ "ޒީރޯ ކޮވިޑް" ސިޔާސަތަށް އަމަލު ކުރުން ހުއްޓައިލާފައި ވަނީ ވެރިރަށް ބެއިޖިންގް ފަދަ ބޮޑެތި ރަށްތަކުގައި ބަލި ފެތުރުން އިތުރުވެފައިވާ ދަނޑިވަޅެއްގައެވެ.
ޗައިނާގެ ނޭޝަނަލް ހެލްތު ކޮމިޝަން (އެން.އެޗް.ސީ)އިން ބުނީ ބަލި ޖެހިފައިވާ މީހުންގެ ފުރިހަމަ އަދަދު ދެނެގަތުމަށް މިހާރު ނުކުޅެދިފައިވާ ކަމުގައެވެ. ސަބަބެއް ކަމުގައި އެ އިދާރާއިން ބުނީ، ޓެސްޓު ކުރުން މަޖުބޫރު ކަމެއްގެ ގޮތުގައި އޮތް އޮތުން ދޫކޮށްލުމެވެ. އެއާއެކު، ބަލިވުމުން ވެސް މީހުން ޓެސްޓު ނުކުރާ ކަމަށް އެ އިދާރާއިން ބުނެއެވެ.
ތިން އަހަރުގެ ދިގު މުއްދަތަކަށް ފަހު، ޓެސްޓު ކުރުމުގެ އިތުރުން ކަރަންޓީނު ކުރުމުގެ އުސޫލުތައް ވެސް ޗައިނާއިން ވަނީ ދޫކޮށްލާފައެވެ. އަދި، ޓެސްޓު ހެދުން މަދުވެފައިވީ ނަމަވެސް، ބަލި ޖެހިފައިވާ މީހުންގެ އަދަދު އިންތިހާއަށް މަތިވެފައިވާ ކަމަށް ޤަބޫލު ކުރެވޭ ކަމުގައި އެން.އެޗް.ސީ.އިން ބުނެއެވެ.
ޗައިނާގެ ބޮޑެތި ރަށްތަކުގައި ހަލުވިކަމާ އެކު ބަލި ފެތުރެމުންދާއިރު، ބަލި ޖެހިފައިވާ އެންމެންނަށް ފަރުވާ ކުރުމަށް އެ ޤައުމުގެ ޞިއްޙީ ނިޒާމު ނުކުޅެދިފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. އަދި، ގިނަ ހޮސްޕިޓަލްތަކަކީ އެކަށީގެންވާ މިންވަރަށް ފައިސާ ނުލިބޭ ތަންތަން ކަމަށާއި، ބަލި ޖެހިފައިވާ މީހުންގެ އަދަދު އިތުރުވުމުގެ ސަބަބުން އެ ތަންތަނުން ޚިދުމަތް ދިނުމަށް ހުރަސްއެޅިފައިވާ ކަމުގައި ވެސް މާހިރުން ބުނެއެވެ.
ހަލުވިކަމާ އެކު ބަލި ފެތުރެމުންދާއިރު، މި ކަމުގެ ނުރައްކާ އެންމެ ބޮޑަށް ކުރިމަތިވެފައި ވަނީ އުމުރުން ދުވަސްވީ މީހުންނަށެވެ. ޗައިނާގެ އުމުރުން ދުވަސްވީ މީހުންގެ އާބާދީގެ ބޮޑު އިންސައްތައެއް އަދިވެސް ވެކްސިންގެ ޑޯޒްތައް ފުރިހަމަކޮށްފައެއް ނުވެއެވެ. އެ އަދަދު އެތަކެއް މިލިޔަނަކަށް އަރާނެ ކަމަށް މަސްރަޙު ދިރާސާ ކުރާ ފަރާތްތަކުން ބުނެއެވެ.
ކޮވިޑް-19އާ ގުޅިގެން ޗައިނާގެ އިޤުތިޞާދަށް ވެސް ދަނީ ބޮޑެތި އަސަރުތަކެއް ކުރަމުންނެވެ. ރެސްޓޯރެންޓުތަކާއި ފިހާރަތައް ހުޅުވުމުގެ ހުއްދަ ދީފައި ވީ ނަމަވެސް، ބަލި ފެތުރުން އިތުރުވެފައިވުމުގެ ސަބަބުން ގިނަ ވިޔަފާރިތައް ވަނީ ބަންދުކޮށްފައެވެ. އަދި، ބަލި ޖެހިފައިވާ ގިނަ މީހުން ހޮސްޕިޓަލްތަކުން ފަރުވާ ހޯދުމުގެ ބަދަލުގައި، އަމިއްލައަށް ގޭގައި ފަރުވާ ކުރަން އިސްކަންދޭ ކަމަށް ވެސް މަސްރަޙު ދިރާސާ ކުރާ ފަރާތްތަކުން ބުނެއެވެ.
މި ކަމާ ގުޅިގެން ބޭސްފިހާރަތަކުން ވިއްކާ ހުމާއި ރޯގާ ބޭސް ވަނީ ހުސްވާން ފަށާފައެވެ. އަދި، ބައެއް ބޭސްފިހާރަތަކުގައި އެ ފަދަ ބޭސްތައް ވަނީ މުޅިން ހުސްވެފައެވެ. މީގެ އިތުރުން، ގޭގައި ޓެސްޓު ކުރަން ބޭނުންކުރާ އެންޓިޖެން ޓެސްޓު ކިޓު މަދުވެ، އެ ތަކެތީގެ ކަޅު ބާޒާރެއް މިހާރު ވަނީ އުފެދިފައެވެ.
ބޭހާއި ޓެސްޓު ކިޓުތަކުގެ އަދަދު އިންތިހާއަށް އުފުލުމުން އެ ކަން ހުއްޓުވަން ޗައިނާގެ އިދާރާތަކުން ވަނީ މަސައްކަތް ފަށާފައެވެ. މި ގޮތުން، ޤަވާޢިދާ ޚިލާފަށް މަތީ އަގުތަކުގައި ބޭސް ވިއްކާ ބޭސްފިހާރައެއް 43,000 ޑޮލަރުން ޖޫރިމަނާ ކޮށްފައިވާ ކަން ކަމާގުޅޭ އިދާރާތަކުން ވަނީ އިޢުލާނު ކޮށްފައެވެ.
Ads by STO
