ދޯންޏެއްގައި ރޯވެ އަޑިއަށް ގޮސް، މީހަކު ގެއްލިއްޖެ
ލ. ގަމު ތުނޑިއާއި ދިމާލުން ދަތުރުކުރި ދޯންޏެއްގައި އަލިފާން ރޯވެ، އަޑިއަށް ގޮސް އޭގެން މީހަކު ގެއްލިއްޖެއެވެ.
އެމްއެންޑީއެފް އިން މައުލޫމާތު ދީފައިވާ ގޮތުގައި ގެއްލިގެން ހޯދަމުންދަނީ އެދޯނިން ދަތުރުކުރަމުންދިޔަ ބިދޭސީއެކެވެ. އޭނާ ހޯދުމަށް އެމްއެންޑީއެފް ސެންޓްރަލް އޭރިއާ ކޯސްޓުގާޑުން ދަނީ ހަރަކާތްތެރިވަމުންނެވެ.
މިހާދިސާގެ ރިޕޯޓު އެމްއެންޑީއެފް އަށް ލިބިފައިވަނީ މިއަދު މެންދުރުފަހު 15:00 ހާއިރުއެވެ.
އެދޯނީގެ ކައްޕިއާއި ހަވާލާދީ އެމްއެންޑީއެފް އިން ބުނެފައިވަނީ، އެދޯނީގައި ދަތުރު ކުރަމުން ދިޔައީ 10 މީހުން ކަމަށެވެ.
އަލިފާން ރޯވެ އަޑިއަށް ގޮސްފައިވަނީ "ވިންދު" ނަމަކަށް ކިޔާ ކާގޯ ދޯންޏެއްގައެވެ. އޭގައި ދަތުރު ކުރަމުން ދިޔައީ ދިވެއްސަކާއި ނުވަ ބިދޭސީންނެވެ.
ދޯނީގައި ރޯވި އަލިފާންގަނޑު މިހާރު ކޮންޓްރޯލް ކުރެވިފައިވާ ކަމަށާއި އަލިފާން ރޯވުމުގެ ސަބަބުން އެދޯންޏަށް ބޮޑެތި ގެއްލުންތަކެއް ލިބިފައިވާ ކަމަށް ވެސް އެމްއެންޑީއެގފް އިން މައުލޫމާތު ދީފައިވެއެވެ.
އިތުރު ތަފްސީލު ލިބުނު ވަރަކުން ހާމަ ކޮށްދެއްވާނަމެވެ.
