ވަގަށް ނަގައިފައިވާ ޕީޕީއެމްގެ މެމްބަރުން ރުޖޫއަ ކޮށްދިނުމަށް އެދޭތާ އަހަރެއް: ޠަލާލް
ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް)ގެ ދަފްތަރުން ވަގަށް ނަގާފައި ތިބި މެމްބަރުން ރުޖޫއަ ކޮށްދިނުމަށް އެދޭތާ އެެއް އަަހަރުވެގެން ދިޔައިރުވެސް، އެކަން ނުކުރައްވާ ކަމަށް ވިދާޅުވެ، އެ ޕާޓީގެ ސެކްރެޓަރީ ޖެނެރަލް މުޙައްމަދު ޠަލާލް ކަންބޮޑުވުންފާޅުކުރައްވައިފިއެވެ.
މޯލްޑިވްސް ޑިމޮކްރެޓިކް ޕާޓީ، އެމްޑީޕީއަށް ސޮއިކޮށްފައި ތިބި މެމްބަރުންގެ ތެރެއިން ބަޔަކު އެ މީހުންނަށް ނޭނގި އެހެން އެއްވެސް ޕާޓީއަކަށް ވައްދާފައިވާ ނަމަ އެމެންބަރަކު ރުޖޫއަކޮށްދޭނެ ކަމަށް އެމްޑީޕީން ވަނީ ވިދާޅުވެފައެވެ.
އެ ޕާޓީން މިއަދު ކުރި ޓްވީޓެއްގައި ވަނީ އެމްޑީޕީގެ އެއްވެސް މެންބަރަކަށް ނޭނގި އެހެން ޕާޓީއަކަށް ވައްދާފައިވާ ނަމަ އެކަމަށް ހާއްސަ ފޯމް ފުރިހަމަކުރަން ހުޅުވާލާފައިފައެވެ. އަދި އެ ފޯމްތައް އިލެކްޝަންސް ކޮމިޝަން (އީސީ) އަށް ހުށައެޅުމުން އެކަން ބަލައި އެ މެންބަރަކު އެމްޑީޕީ އަށް ރުޖޫއަކޮށްދޭނެ ކަމަށް ވެސް އެ ޕާޓީން ކުރެއްވި ޓްވީޓްގައި ވިދާޅުވިއެވެ.
މިކަމާ ގުޅިގެން ޠަލާލް ވިދާޅުވީ، ޕީޕީއެމުން މިފަދައިން އެދޭތާ އަހަރެއް ވީއިރުވެސް، އިލެކްޝަންސް ކޮމިޝަން(އީސީ)އިން މިކަން ކުރައްވާފައި ނުވަނީ، ޤާނޫނީ ހުރަސްތައް ހުރި ކަމަށް ވިދާޅުވެ، ހުއްޖަތް ދެއްކުމަށް ފަހުގައި ކަމަށެވެ.
"އެމްޑީޕީން ބޭނުންވުމުން މިކަން ހަމަ ޓަސް...." އީސީ ޓެގް ކުރައްވައި، އޭނާ ވިދާޅުވިއެވެ.
އެހެން ޕާޓީތަކުގައި ތިބި އެމްޑީޕީގެ މެމްބަރުން ރުޖޫއަ ކޮށްދޭނެ ކަމަށް އެ ޕާޓީން ބުނާއިރު، ޕީޕީއެމްގެ ގިނަ މެމްބަރުންތަކެއް، ކުދި ސިޔާސީ ޕާޓީތަކުން އަދަދު ހަމަ ކުރުމަށް "ވަގަށް" ނަގައިފައިވާ ކަމަށް ޕީޕީއެމުންވެސް ތުހުމަތު ކުރައްވައެވެ.
