ޤުރުއާން ކިޔަވަންދިޔަ ކުއްޖަކަށް ޖިންސީ ގޯނާކުރި މީހަކު 15 އަހަރަށް ޖަލަށް
އަންހެން ކުއްޖަކަށް ޖިންސީ ގޯނާކުރި މީހަކު 15 އަހަރަށް ޖަލަށްލުމަށް ކްރިމިނަލް ކޯޓުން މިއަދު ޙުކުމް އިއްވަވައިފިއެވެ.
މި ޙުކުމް އިއްވެވީ ދ.ހުޅުދެލި/ޝާރާޒް، ޢަލީ ޝާތިރުގެ މައްޗަށެވެ.
ދަޢުވާގައި ބުނެފައިވަނީ 2021 ވަނަ އަހަރުގެ ޖުލައި މަހާއި އޮގަސްޓް މަސްތެރޭގައި ކުޑަ އަންހެން ކުއްޖަކު އޭނާގެ ގާތަށް ޤުރްއާން ކިޔެވުމަށް ދިޔަ ދުވަހެއްގައި ކުއްޖާގެ ގާތު ''ވަރަށް ލޯބިވެޔޭ'' ބުނެ ކުއްޖާގެ މޭމަތީގައި އޭނާ އަތްލާފައިވާ ކަމަށެވެ.
އޭނާގެ މައްޗަށް އުފުލީ އިތުބާރުކުރެވޭ މަޤާމެއްގައި ހުރެ ކުޑަކުއްޖަކާމެދު ޖިންސީ ޢަމަލު ހިންގުމުގެ ކުށުގެ ދަޢުވާއެވެ. ނަމަވެސް އޭނާ ވަނީ ދަޢުވާއަށް އިންކާރުކޮށްފައެވެ.
ގާޒީ އާދަމް މުޙައްމަދު އިއްވެވި ޙުކުމުގައި ވަނީ މައްސަލަ ސާބިތުކުރުމަށް ދައުލަތުން ހުށަހަޅާފައިވާ އެންމެހާ ހެކި ޤަރީނާއަށް ބަލާއިރު, މި މައްސަލައަކީ އެކަށީގެންވާ ޝައްކެއް ނެތް މިންވަރަށް ޝަރީޢަތަށް ސާބިތުވާ މައްސަލައެއްކަމުގައި ކަނޑައަޅުއްވާ ކަމަށެވެ. އަދި މި ކުށުގެ ޢުޤޫބާތެއްގެ ގޮތުން ޢަލީ ޝާތިރު 15 އަހަރު ދުވަހުގެ މުއްދަތަށް ޖަލަށްލުމަށް ޙުކުމް ކުރައްވާ ކަމަށެވެ.
މި މައްސަލައާ ގުޅިގެން ތަޙްޤީޤު މަރުހަލާގައި އަދި ޝަރީޢަތުގެ މަޖިލީހުގައި ޝާތިރު ވަނީ އެއް އަހަރާއި ހަތަރު މަސްދުވަސް ބަންދުގައި ހޭދަކޮށްފައެވެ. ބަންދުގައި ހުރި މުއްދަތު ޙުކުމުގެ މުއްދަތުން އުނިކުރުމުން ތަންފީޒުކުރަންޖެހޭ އަދަބަކީ 13 އަހަރާއި އަށް މަސްދުވަސް ކަމަށް ގާޒީ ވަނީ ކަނޑައަޅުއްވައިފައެވެ.
Ads by STO
