ޗައިނާގައި ދެން ކަރަންޓީންވާން ނުޖެހޭނެ
ޗައިނާގައި ކޮވިޑް-19 ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތަކުގެ ތެރެއިން އެ ޤައުމަށް އެތެރެވުމުގެ ކުރިން ފުރިހަމަ ކުރަން ޖެހޭ ކަރަންޓީނު އަންނަ ޖަނަވަރީ މަހުގެ 8 ވަނަ ދުވަހުން ފެށިގެން އުވައިލަން އެ ޤައުމުން ނިންމައިފިއެވެ. ކޮވިޑާ ގުޅިގެން އަޅާފައިވާ ހަރުކަށި ފިޔަވަޅުތަކަށް ޗައިނާއިން ލުއިދޭން ފަށާފައި ވަނީ ޑިސެންބަރު 7 ވަނަ ދުވަހުން ފެށިގެންނެވެ.
ޗައިނާއަށް އެތެރެވާއިރު ފުރިހަމަކުރަން ޖެހޭ ކަރަންޓީން ތިން އަހަރުގެ މުއްދަތަކަށް ފަހު އުވައިލާއިރު، މިއީ އެ ޤައުމުގެ ރައްޔިތުންނަށް އުފާވެރި ޚަބަރެކެވެ. އަދި، ގިނަ އަދަދެއްގެ ބަޔަކު ވަނީ ބޭރު ޤައުމުތަކަށް ދަތުރު ކުރުމަށް ތައްޔާރުވާން ފަށާފައެވެ. ނަމަވެސް، ޗައިނާއިން މި ފިޔަވަޅު ވެސް ދޫކޮށްލަން ނިންމާފައި މި ވަނީ، ކޮންޓްރޯލް ކުރަން ދަތި މިންވަރަކަށް އެ ޤައުމުގައި ބަލި ފެތުރެމުންދާ ދަނޑިވަޅެއްގައެވެ.
ކޮވިޑް ފެތުރުން ކޮންޓްރޯލް ކުރުމަށް ޗައިނާއިން އަމަލު ކުރަމުންދިޔަ "ޒީރޯ ކޮވިޑް" ސިޔާސަތަށް އެ ޤައުމުން އަމަލު ކުރުން ހުއްޓައިލާފައި ވަނީ، ގިނަ ބަޔެއްގެ ފާޑުކިޔުންތައް އަމާޒުވެ، ފިޔަވަޅުތަކާ ދެކޮޅަށް ބޮޑެތި މުޒާހަރާތަކެއް ބޭއްވުމާ ގުޅިގެންނެވެ. އަދި، ފިޔަވަޅުތަކުގެ ސަބަބުން އެ ޤައުމުގެ އިޤުތިޞާދަށް ވެސް ވަނީ ނުރަނގަޅު އަސަރުތަކެއް ކޮށްފައެވެ.
ނަމަވެސް، ފިޔަވަޅުތައް އުވައިލުމާ އެކު ޗައިނާގެ އެކި ކަންކޮޅުތަކުގައި މި ބަލި ހަލުވިކަމާ އެކު ފެތުރެން ފެށިއެވެ. އަދި، މި ބަލި ފެތުރެމުންދާ މިންވަރު ފުރިހަމައަށް ދެނެގަތުމަށް ވެސް މިހާރު ދަތިވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. ބޮޑެތި ބައެއް ރަށްތަކުގައި ދުވާލެއްގެ މައްޗަށް 50,000 އަށްވުރެ ގިނަ މީހުންނަށް ބަލި ޖެހެމުންދާ ކަމުގައި ރިޕޯޓުތައް ބުނެއެވެ.
މި ކަން ހާމަވަނީ، ކޮވިޑަށް ފަރުވާ ކުރާ މީހުންގެ އަދަދުތައް އިތުރުވެ، ހޮސްޕިޓަލުތަކާއި ޞިއްޙީ ޚިދުމަތްދޭ އެހެން ތަންތަން ފުރެން ފެށުމުންނެވެ. ހޮސްޕިޓަލުތަކުގައި އެޑްމިޓްކޮށްގެން އެތަކެއް ހާސް ބަޔަކަށް ފަރުވާދެމުންދާއިރު، މީގެ ތެރޭގައި ގިނައީ އުމުރުން ދުވަސްވީ މީހުންނެވެ. ޗައިނާގެ އުމުރުން ދުވަސްވީ މީހުންގެ އާބާދީގެ ބޮޑު އިއްސައްތައެއް ވެކްސިންގެ ޑޯޒްތައް ފުރިހަމަ ކޮށްފައި ނުވެއެވެ.
ކޮވިޑްގެ ހާލަތު މި ގޮތަށް އޮތް ނަމަވެސް، އެ ޤައުމަށް އެތެރެވާއިރު ފުރިހަމަކުރަން ޖެހޭ ކަރަންޓީނު އުވައިލުމާ އެކު އެތަކެއް ހާސް ބަޔަކު ދަނީ ބޭރު ޤައުމުތަކަށް ދަތުރު ކުރުމަށް ތައްޔާރުވަމުންނެވެ. މި ގޮތުން، ވައިގެ ދަތުރުފަތުރާ ބެހޭ މަޢުލޫމާތު ހޯދާ މީހުންގެ އަދަދު އިތުރުވެފައިވާ ކަމުގައި އެ ޤައުމުގެ ނޫސްތަކުން ބުނެއެވެ.
ޗުއްޓީގެ ކަންކަން އިންތިޒާމުކޮށްދޭ ޕްލެޓްފޯމެއް ކަމުގައިވާ ޓޮންގްޗެންގްއިން ވަނީ، އެ ޕްލެޓްފޯމް މެދުވެރިކޮށް އެހެން ޤައުމުތަކަށް ދަތުރުކުރުމާ ގުޅޭ މަޢުލޫމާތު ހޯދާ މީހުންގެ އަދަދު 850 އިންސައްތަ އިތުރުވެފައިވާ ކަމަށް ބުނެފައެވެ. މި ފަދަ އެހެން ޕްލެޓްފޯމެއް ކަމުގައިވާ ޓްރިޕް.ކޮމް އިން ބުނީ، އެ ޕްލެޓްފޯމް މެދުވެރިކޮށް މަޢުލޫމާތު ހޯދާ މީހުންގެ އަދަދު 10 ގުނަ އިތުރުވެފައިވާ ކަމުގައެވެ. ގިނަ މީހުން މަޢުލޫމާތު ހޯދަނީ މަކާއޫ، ހޮންގް ކޮންގް، ޖަޕާން، ތައިލެންޑު އަދި ދެކުނު ކޮރެޔާއަށް ދަތުރުކުރުމާ ގުޅޭ ގޮތުންނެވެ.
ނަމަވެސް، ޗައިނާގައި ހަލުވިކަމާ އެކު ކޮވިޑް ފެތުރެމުން ދިޔުމާ ގުޅިގެން، ބައެއް ޤައުމުތަކުން ވަނީ އެ ޤައުމުގެ ދަތުރުވެރިންނަށް އަމާޒުކޮށް ރައްކާތެރިކަމުގެ ފިޔަވަޅުތައް އަޅާފައެވެ. މީގެ ތެރޭގައި ޖަޕާނު ހިމެނެއެވެ. ޗައިނާއިން ފުރައިގެން ދަތުރުކުރާ މީހުންނަށް ޖަޕާނަށް އެތެރެވުމުގެ ކުރިން ޕީ.ސީ.އާރް. ނެގެޓިވް ޓެސްޓެއް ހުށަހަޅަން ޖެހޭ ގޮތަށް މިހާރު ވަނީ އުސޫލުތަކަށް ބަދަލު ގެނެސްފައެވެ.
ޗައިނާ ފުރަބަންދުކޮށް، އެ ޤައުމަށް އެތެރެވާ މީހުން ކަރަންޓީނު ކުރުވަން ފަށާފައި ވަނީ 2020 މާރިޗު މަހުގައެވެ. އެ ޤައުމަށް އެތެރެވާ މީހުން ތިން ހަފުތާގެ މުއްދަތަކަށް ކަރަންޓީނު ކުރަން ޖެހެނީ ސަރުކާރުން ކަނޑައަޅާފައިވާ ޚާއްޞަ މަރުކަޒުތަކެއްގައެވެ. ނަމަވެސް، ޖޫން މަހު ކަރަންޓީނުގެ މުއްދަތު ވަނީ އެއް ހަފުތާއަށް ކުރުކޮށްފައެވެ. އަދި، ހުސްވި ނޮވެންބަރު މަހުގެ ތެރޭގައި އެ މައްދަތު ވަނީ ފަސް ދުވަހަށް ހަދާފައެވެ.
ޗައިނާއަށް އެތެރެވާ މީހުން ފުރިހަމަ ކުރަން ޖެހޭ ކަރަންޓީނު އުވައިލުމަށް އެ ޤައުމުން ނިންމާފައިވީ ނަމަވެސް، އެ ޤައުމަށް އެތެރެވުމަށް އަދިވެސް ގިނަ ހުރަސްތަކެއް އެބަހުއްޓެވެ. މި ގޮތުން، ފަތުރުވެރިންނާއި ބޭރު ޤައުމުތަކުގެ ދަރިވަރުންނަށް ވިސާ ދޫކުރަށް ފެށުމާ މެދު އެ ޤައުމުން އަދި ގޮތެއް ނިންމާފައެއް ނުވެއެވެ.
Ads by STO
