ޗައިނާގައި ދުވާލެއްގެ މައްޗަށްނުވަ ހާސް މީހުން މަރުވެދާނެ ކަމަށް ބުނެފި
ކޮވިޑް-19 ޖެހިގެން ޗައިނާއިން ދުވާލެއްގެ މައްޗަށް 9،000 މީހުން މަރުވާނެ ކަމަށް ބެލެވޭ ކަމަށް އިނގިރޭސި ރީސަރޗް ކުންފުންޏެއް ކަމަށްވާ، އެއަރފިނިޓީ އިން ބުނެފިއެވެ.
ސިއްހީ އެކި ދިރާސާތަކަށް ހާއްސަ އިނގިރޭސި ކުންފުންޏެއް ކަމަށްވާ އެއަރފިނިޓީ އިން ބުރާސްފަތި ދުވަހު ބުނީ، އެކުންފުނީގެ ދިރާސާތަކުން ދާއްކާގޮތުން މީގެ ހަފުތާއެއް ކުރިން އެކުންފުނިން ހޯދާފައިވާ ނަންބަރުތައް މިހަފުތާތެރޭ ދެގުނަވަމުންދާތަން ފެންނަކަމަށެވެ.
ޗައިނާގައި ކޮވިޑް-19ގެ ކޭސްތައް މަޑުމަޑުން އިތުރުވާން ފަށާފައި ވަނީ ނޮވެމްބަރު މަހުގެ ތެރޭގައެވެ. ކޮވިޑް-19އާ ގުޅިގެން އެގައުމުގައި އަޅާފައިވާ ފިޔަވަޅުތަކަށް ލުއިދޭން ފެށުމާއެކު މިމަހުން ފެށިގެން އެގައުމުގެ ކޮވިޑް ކޭސްތަކުގެ އަދަދު ވަނީ އިންތިހާއަށް މައްޗަށް ޖެހެން ފަށާފައެވެ.
އެއަރފިނިޓީން ނެރުނު ބަޔާނުގައި ވަނީ ޑިސެމްބަރު މަހުގެ އެއް ވަނަ ދުވަހުން ފެށިގެން މިހާތަނަށް ލައްކައެއްހާ މީހުން ބަލީގައި މަރިވެފައިވާނެ ކަމަށް އެކުންފުނީގެ ދިރާސާތަކުން ދައްކާކަމަށެވެ. އަދި ބަލިޖެހުނު މީހުންގެ ޖުމުލަ އަދަދު މިހާރު 18.6 މިލިއަނަށް އަރާނެ ކަމަށްވެސް އެކުންފުނިން ބުނެއެވެ.
އެއަރފިނިޓީން ބުނަނީ އެކުންފުނިން ޑޭޓާ ހޯދުމަށް ބޭނުންކޮށްފައި ވަނީ ޗައިނާއިން ކުރިން އެގައުމުގެ ކޮވިޑް ކޭސްތައް ހާމަކުރަމުންދިޔަ ގޮތުގެ މައްޗަށް ކަމަށެވެ.
އެކުންފުނިން ވަނީ މިފެށޭ ޖެނުއަރީ މަހުގެ 13 ވަނަ ދުވަހު ޗައިނާގެ ކޮވިޑް ކޭސްތައް ޕީކަށް އަރާނެ ކަމަށާއި އެދުވަހު 3.7 މިލިއަން މީހުން ކޮވިޑަށް ޕޮޒިޓިވްވެގެން ރިޕޯޓުކުރެވޭނެ ކަމަށް އަންދާޒާކޮށްފައެވެ.
އަދި ޗައިނާގައި އެންމެ ގިނަ އަދަދަކަށް ކޮވިޑް މަރުތައް ރިޕޯޓުކުރެވިގެންދާނެ ދުވަހަކީ ޖެނުއަރީ 23 ވަނަ ދުވަސް ކަމަށާި އެދުވަހު 25،000 އެއްހާ މީހުން ބަލީގައި މަރުވި ކަމަށް ރިޕޯޓުކުރެވޭނެ ކަމަށް ކުންފުނިން އަންދާޒާކުރެއެވެ.
ނަމަވެސް ޗައިނާގެ އިދާރާތަކުން ހާމަކޮށްފައިވާ ނަންބަރުތައް ދައްކާގޮތުން ޑިސެމްބަރު ހަތް ވަނަ ދުވަހުން ފެށިގެން މިއަދާ ހަމައަށް ކޮވިޑް ބަލީގައި މަރުވެފައި ވަނީ 10 މީހުންނެވެ.
މިފަހުން ޗައިނާގެ ސިއްހީ އޮފިޝަލުން ވަނީ، އެގައުމުގައި މަރުވާ މީހުން، ކޮވިޑް ބަލީގައި މަރުވާކަމަށް ބެލެވޭނީ ނޭވާލާ ނިޒާމް ފެއިލްވުމުގެ ސަބަބުން މަރުވާ މީހުން އެކަނި ކަމަށް ހަދައި ކޮވިޑް މަރުގެ ގޮތުގައި ގުނޭ މަރުތަކަށް ބަދަލު ގެނަސްފައެވެ. ކޮވިޑް-19ށް ޕޮޒިޓިވްވާ މީހުންގެ ތެރެއިން އެނޫން ގޮތަކަށް މީހުން މަރުވުމުން، އެމީހުން މަރުވީ ކޮވިޑް ބަލީގައި ކަމަށް ނުގުނާނެ ކަމަށް އޮފިޝަލުން ބުނެއެވެ.
2020 ވަނަ އަހަރު ކޮވިޑް-19 ބަލިމަޑުކަން އިއުލާންކުރިފަހުން، ޑިސެމްބަރު 28ގެ ނިޔަލަށް ޗައިނާއިން ރިޕޯޓުކޮށްފައި ވަނީ 5،246 ކޮވިޑް މަރެވެ.
ނަމަވެސް އެއަރފިނިޓީން އަންދާޒާކުރަނީ އަންނަ އަހަރުގެ އޭޕްރިލް މަހުގެ ނިޔަލަށް ޗައިނާއިން 1.7 މިލިއަން މީހުން ކޮވިޑް ބަލީގައި މަރުވާނެ ކަމަށެވެ.
