ބްރިޖެއް ބޭނުމެއް ނޫން، ބޭނުންވަނީ އިންސާފު- ޝުޖާޢު
މި ސަރުކާރުން އަޅަން އުޅޭ ބްރިޖު ބޭނުން ނުވާ ކަމަށާއި، ބޭނުންވަނީ އިންސާފު ކަަމަށް ޕީއެންސީގެ ނައިބު ރައީސް އިބްރާހީމް ޝުޖާޢު ވިދާޅުވެއްޖެއެވެ.
ޝުޖާޢު މިއަދު ކުރެއްވި ޓްވީޓެއްގައި ވިދާޅުވީ، ބްރިޖެއް ބޭނުން ނުވާ ކަަމަށާއި، ބޭނުންވަނީ އިދިކޮޅު ލީޑަރު، ރައީސް ޔާމީން އަބްދުލްޤައްޔޫމަށް އިއްވައިފައިވާ "ހަރާން" ޙުކުމް ބާޠިލު ކުރަން ކަމަށެވެ.
"އަހަރުމެން ބޭނުންވަނީ އިންސާފު" ކަމަށް ޝުޖާޢުގެ ޓްވީޓުގައި ތަކުރާރުކޮށް ލިޔުއްވައިފައިވެސް ވެއެވެ.
ރައީސް ޔާމީންގެ މައްޗަށް އުފުލި ދެ ދަޢުވާއެއް ޘާބިތުވާ ކަަމަށް ކަނޑަައަޅައި، އެމަނިކުފާނަށް 11 އަހަރުގެ ޖަލު ޙުކުމެއް އިއްވީ މިދިޔަ މަހުގެ 25 ވަނަ ދުވަހުއެވެ. އެ ޙުކުމާއެކު، އެމަނިކުފާނަށް މި އަހަރުގެ ރިޔާސީ އިންތިޚާބުގައި ވާދަކުރެއްވުމުގެ ދޮރު ވަނީ ބަންދުވެފައެވެ.
ރައީސް ޔާމީންގެ ޤާނޫނީ ވަކީލުންގެ ޓީމުން ވިދާޅުވީ، އިސްތިއުނާފީ ކޯޓުން ރައީސް ޔާމީނަކީ މައުސޫމް ބޭފުޅެއްކަން ޘާބިތުވާނެ ކަމަށާއި، އެކަމުގެ ފުރިހަމަ ޔަޤީންކަން، އެމަނިކުފާނަށް ތާއީދު ކުރާ އެތައް ހާސް ރައްޔިތުންނަށް އަރުވާ ކަަމަށެވެ.
ރައީސް ޔާމީނަށް އިއްވި ޙުކުމް ބާޠިލު ކޮށްފިނަމަ، ރިޔާސީ ރޭހަށް ނުކުންނެވުމަށް، އެމަނިކުފާނަށް އެއްވެސް ހުރަހެއް ނޯންނާނެއެވެ.
