ޗައިނާއާ ދެކޮޅަށް ފިޔަވަޅު އަޅާ ޤައުމުތަކަށް ފިޔަވަޅު އަޅާނެ ކަމުގެ އިންޒާރު
ހަމައެކަނި ޗައިނާއިން ދަތުރުކުރާ ފަރާތްތަކަށް ހުޅަނގުގެ ޤައުމުތަކުން ފިޔަވަޅު އަޅާފައިވާތީ، އެކަމަށް ޗައިނާއިން ފާޑު ވިދާޅުވެއްޖެއެވެ.
ޗައިނާ ސަރުކާރުން ވަނީ ޗައިނާއިން ދަތުރުކުރާ ފަސިންޖަރުންގެ މައްޗަށް ކޮވިޑް-19 އަށް ޓެސްޓު ކުރަން ޖެހޭ ޝަރުތުތަކަށް ވަރަށް ބޮޑަށް ފާޑުކިޔައި، އެމެރިކާ އާއި ޔޫރަޕްގެ ބައެއް ގައުމުތައް ހިމެނޭ ގޮތަށް އެ ކަމުގައި ޝާމިލްވާ ގައުމުތަކާ ދެކޮޅަށް ފިޔަވަޅު އަޅާނެ ކަމުގެ އިންޒާރު ދީފައެވެ.
ފޮރިން މިނިސްޓްރީގެ ތަރުޖަމާނު މާއޯ ނިންގް ވިދާޅުވީ ޗައިނާއަށް އަމާޒުކޮށް ބައެއް ގައުމުތަކުން އަޅާފައިވާ ފިޔަވަޅުތަކުގައި ސައިންޓިފިކް އަސާސެއް ނެތް ކަމަށާއި، ހަމައެކަނި ވަކި ޤައުމެއްގެ މީހުން ޓެސްޓް ކުރުމަކީ ބަލައިގަނެވޭނެ ކަމެއް ނޫން ކަމަށެވެ.
އެކަމަނާ ވިދާޅުވީ ސިޔާސީ ބޭނުމަށް ކޮވިޑްގެ ފިޔަވަޅުތައް އޮޅުވާލަން ކުރާ މަސައްކަތާ ވަރަށް ބޮޑަށް ދެކޮޅު ކަމަށާއި، ރެސިޕްރެސީގެ އުސޫލުގެ މައްޗަށް ބިނާކޮށް ފިޔަވަޅުއަޅާނެ ކަމަށެވެ. ނަމަވެސް ޗައިނާއިން އެޅިދާނެ ފިޔަވަޅެއް މާއޯ ވިދާޅެއް ނުވެއެވެ.
އެމެރިކާ، އިނގިރޭސިވިލާތް، އިންޑިއާ، ޖަޕާން، ކެނެޑާ، އޮސްޓްރޭލީ އަދި ޔޫރަޕްގެ ބައެއް ގައުމުތަކުން ވަނީ ޗައިނާއިން ދަތުރުކުރާ މީހުންނަށް ކޮވިޑް-19 ޓެސްޓް ކުރަން މަޖުބޫރުކޮށްފައެވެ. އެގޮތަށް ފިޔަވަޅު އަޅަން ނިންމާފައި މިވަނީ ޗައިނާގައި ބަލި ފެތުރޭ މިންވަރުގެ ތަފާސް ހިސާބު ނެތުމާއި އާ ވޭރިއަންޓްތައް އުފެދިދާނެ ކަމުގެ ބިރު ހީވެފައިވާ ދަނޑިވަޅެއްގައެވެ.
