އެމްޑީޕީން ކޮންމެ ކެންޑިޑޭޓެއް ނެރުނަސް، ބަލި ކުރާނަން: ޝުޖާޢު
ވެރިކަން ކުރާ މައި ޕާޓީ، އެމްޑީޕީގެ ރިޔާސީ ކެންޑިޑޭޓަކީ ކޮންމެ ބޭފުޅަކު ކަމުގައިވިޔަސް، އެ ކެންޑިޑޭޓަކު ބަލި ކުރާނެ ކަމަށް އިދިކޮޅު ޕީއެންސީގެ ނައިބު ރައީސް އިބްރާހީމް ޝުޖާޢު ވިދާޅުވެއްޖެއެވެ.
ހުޅުމާލޭގެ ކައުންސިލަރު ކުރެއްވި ޓްވީޓެއްގައި ވިދާޅުވެފައިވަނީ މިކަން ކާމިޔާބު ކުރުމަށްޓަކައި، ރައްޔިތުން ކަށަވަރުކޮށްދޭންވީ އެއް ކަމެއް ކަމަށާއި، އެއީ ވޯޓުލާނީ ރީ-ރަޖިސްޓްރީ ކުރާ ތަނަށްތޯ ކަށަވަރު ކުރުން ކަމުގައެވެ.
"ބާކީ ބައި އަޅުގަނޑުމެނަށް ދޫކޮށްލާ!" އޭނާ ވިދާޅުވިއެވެ.
ޝުޖާޢު އިތުރަށް ވިދާޅުވީ "ކަނޑު ވިއްކައިލި ބައިގަނޑަށް" މިފަހަރު ފިލާވަޅެއް ލިބޭނެ ކަމަށެވެ.
މި އަހަރުގައި ބާއްވާ ރިޔާސީ އިންތިޚާބުގައި، އެމްޑީޕީން ކޮންމެ ބޭފުޅަކު ވާދަކުރެއްވިޔަސް، އެ ބޭފުޅަކު އިދިކޮޅުން ބަލި ކުރާނެ ކަމަށް ޝުޖާޢު ވިދާޅުވިއިރު، އެމްޑީޕީގެ ރިޔާސީ ކެންޑިޑޭޓް ކަނޑައެޅުމަށް ބާއްވާ ޕްރައިމަރީ މި މަހު 28 ގައި އޮންނާނެއެވެ. މި އިންތިޚާބުގައި ވާދަކުރައްވަނީ ރައީސް އިބްރާހީމް މުޙައްމަދު ޞާލިޙާއި އެމްޑީޕީގެ ރައީސް މުޙައްމަދު ނަޝީދެވެ.
ޕީޕީއެމްގެ ރިޔާސީ ކެންޑިޑޭޓް، ރައީސް ޔާމީން އަބްދުލްޤައްޔޫމް 11 އަހަރަށް ޖަލަށް ލުމަށް ކުރި ޙުކުމް ތަންފީޒު ކުރައްވަމުން އަންނައިރު، ރިޔާސީ އިންތިޚާބުގެ ކުރިން، އެމަނިކުފާނު މިނިވަން ކުރުމަށް ކުރެވެން ހުރި ހުރިހައި ކަމެއް ކުރާނެ ކަަމަށް އިދިކޮޅު ކޯލިޝަނުން ވަނީ ބުނެފައެވެ.
