ފަލަސްތީނުގެ ހައްޤުގައި ރާއްޖެއިން އަބަދުވެސް އަޑު އުފުލާނެ ކަމަށް ޝާހިދު ވިދާޅުވެއްޖެ
ފަލަސްތީނުގެ ރައްޔިތުންގެ ޙައްޤުގައި އަޑުއުފުލުމުގައި ރާއްޖެއިން އަބަދުވެސް ފަސްނުޖެހި ކުރިއަށްދާނެކަމަށް ފޮރިން މިނިސްޓްރީން ވިދާޅުވެއްޖެއެވެ.
އިޒްރޭލުގެ ނެޝަނަލް ސެކިއުރިޓީ މިނިސްޓަރ، އަލް އަޤްސާ މިސްކިތުގެ ހަރިންމަ ތެރެއަށް ވަނުމާއި ގުޅިގެން، އެކަން ކުށްވެރިކުރައްވައި، ފޮރިން މިނިސްޓްރީން ނެރުއްވި ބަޔާނެއްގައި ވިދާޅުވީ އިޒްރޭލުގެ ނެޝަނަލް ސެކިއުރިޓީ މިނިސްޓަރ، އަލް އަޤްސާ މިސްކިތުގެ ހަރިންމަ ތެރެއަށް މިމަހުގެ 3 ވަނަ ދުވަހު ވަތް ވަނުމަކީ ބައިނަލްއަޤްވާމީ އެއްބަސްވުންތަކާއި ޤާނޫނުތަކާއި އުޞޫލުތަކާ ޚިލާފު ކަމެއް ކަމަށެވެ.
އަދި މި ޢަމަލުގެ ސަބަބުން މެދު އިރުމަތީގެ މަސްރަހު އިތުރަށް ހަލަބޮލިވެގެން ހިނގައިދާނެކަމަކަށް ވުމާއެކު، އެކަން ކުށްވެރިކޮށް، އޯގަނައިޒޭޝަން ފޮރ އިސްލާމިކް ކޯރޕަރޭޝަން (އޯ.އައި.ސީ) އިން އދ. ގައި ކުރަމުންދާ މަސައްކަތުގައި ދިވެހިރާއްޖެއިން ބައިވެރިވަމުންދާ ކަމަށްވެެސް ބަޔާނުގައިވެއެވެ.
އޯ.އައި.ސީ.އިންނާއި އދ.ގެ ސަލާމަތީ މަޖިލީހުގެ ބައެއް މެންބަރުންގެ އިސްނެންގެވުމުގެ މަތީން މިމަހުގެ ފަސް ވަނަ ދުވަހު، ސަލާމަތީ މަޖިލީހުގެ އިމަޖެންސީ ބައްދަލުވުމެއް ބާއްވައި، ބަޔާނެއް ދެއްވިއެވެ.
އަދި މި މަހުގެ 18 ވަނަ ދުވަހު މެދުއިރުމަތީގެ ޙާލަތާ ބެހޭގޮތުން ބަހުސެއް ބޭއްވުމަށް ހަމަޖެހިފައިވާއިރު، ފޮރިން މިނިސްޓްރީން ވަނީ، ރާއްޖެއިން މި ބަހުސްގައި ބައިވެރިވާނެކަން ހާމަކުރައްވައިފައެވެ.
Ads by STO
