ރައީސް ނަޝީދުގެ ކެމްޕެއިން: ފ.އަތޮޅަށް ވަޑައިގެންފި
ވެރިކަން ކުރާ މައި ޕާޓީ، އެމްޑީޕީގެ ރިޔާސީ ޕްރައިމަރީގައި ވާދަކުރައްވާ އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ކެމްޕޭންގައި ފ. އަތޮޅަށް މިއަދު ވަޑައިގެންފިއެވެ.
އެގޮތުން އެމަނިކުފާނު ވަނީ އެ އަތޮޅު ފީއައްޔަށް ވަޑައިގެން، ދޮރުން ދޮރަށް ހިންގަވައި، އެ ރަށުގެ ރައްޔިތުންނާ ބައްދަލު ކުރައްވައިފައެވެ.
ރައީސް ނަޝީދު މީގެ ކުރިން ވިދާޅުވެފައިވަނީ، އެމްޑީޕީގެ ރިޔާސީ ޕްރައިމަރީ އެމަނިކުފާނަށް ކާމިޔާބު ކުރެއްވޭނެ ކަމާމެދުގައި އެއްވެސް މިންވަރަކަށް ޝައްކު ނުކުރައްވާ ކަމަށެވެ.
ރައީސް ނަޝިދު ފީއައްޔަށް ވަޑައިގެންނެވީ ހަތަރު އަތޮޅަކަށް އިއްޔެ ފެއްޓެވި ކެމްޕޭން ދަތުރުފުޅުގެ ތެރެއިންނެވެ.
އއ. އަތޮޅާއި އދ. އަތޮޅުގެ އިތުރުން ފ. އަތޮޅާއި ދ. އަތޮޅުގެ ކެމްޕޭން ދަތުރުފުޅަށްފަހު ރައީސް ނަޝީދު އެނބުރި މާލެ ވަޑައިގަތުމަށް ހަމަޖެހިފައިވަނީ މިއަދުއެވެ.
އެމްޑީޕީގެ ރިޔާސީ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 28 ވަނަ ދުވަހުއެވެ. މި އިންތިޚާބުގައި ރައީސް ނަޝީދާ ވާދަ ކުރައްވާނީ، އެމްޑީޕީގެ އިސް ލީޑަރު، ރައީސް އިބްރާހީމް މުޙައްމަދު ޞާލިޙެވެ. ރައީސް ޞާލިޙުވެސް ކެމްޕެއިން ކުރެއްވުމަށް އަތޮޅުތެރެއަށް ދަތުރުފުޅު ކުރައްވަމުން ގެންދަވާއިރު، މިފަހަރުގެ ޕްރައިމަރީގެ ފޯރި، ވަރަށް ގަދަވާނެ ކަމަށް ބެލެވެއެވެ.
