ވެރިކަމަށް އައީ ނަޝީދުގެ އެކަނި ތާއީދާއިއެކުއެއް ނޫން، ރައްޔިތުންގެ ވޯޓުން: ރައީސް ޞާލިޙް
ވެރިކަމަށް ވަޑައިގެންނެވީ ކުރީގެ ރައީސް މުހައްމަދު ނަޝީދުގެ އެކަނި ތާއީދާއިއެކު ނޫން ކަމަށާއި ވެރިކަން ލިބިވަޑައިގެންނެވީ ރާއްޖޭގެ ގިނަ ރައްޔިތުންތަކެއްގެ ތާއީދާއިއެކު ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެ އެވެ.
ރައީސް ޞާލިހު ރައްދު ދެއްވާފައި މިވަނީ އެމްޑީޕީގެ ޕްރައިމަރީގައި އެމަނިކުފާނާއި ވާދަކުރައްވާ ކެނޑިޑޭޓު އެޕާޓީގެ ރައީސް މުހައްމަދު ނަޝީދު ދެއްކެވި ވާހަކަފުޅުތަކަކަށެވެ. އެގޮތުން ރައީސް ނަޝީދު ރޭ ވިދާޅުވެފައިވަނީ ރައީސް ޞާލިހު ވެރިކަމަށް ގެންނެވީވެސް އަދި ކުރިއަށް އޮތް ތަނުގައި ވެރިކަމުން ދުރު ކުރާނީވެސް ނަޝީދު ކަމަށެވެ.
މިކަމަށް ރައްދު ދެއްވަމުން ރައީސް ޞާލިހު ވިދާޅުވީ މާތް ﷲ ގެ އަޅުންނަށް އޮންނަނީ މަސައްކަތް ކުރުން ކަމަށެވެ. އެހެންކަމުން ވެރިކަން ލިބުނީ ވަކި މީހެއްގެ އެކަނި ތާއީދު ލިބިގެން ނޫންކަމަށާއި އެއީ ﷲގެ ވާގިފުޅާއިއެކު ގިނަ ރައްޔިތުންތަކެއްގެ ތާއީދާއިއެކު ލިބުނު އެއްޗެއް ކަމަށް ރައީސް ޞާލިހު ވިދާޅުވި އެވެ. ވެރިކަމުގައި ދެމިހުންނަންވެސް ބޭނުންވަނީ ރައްޔިތުންގެ ވޯޓުކަމަށް ރައީސް ވިދާޅުވި އެވެ.
ރައީސް ނަޝީދު ވަނީ ގާނޫނު އަސާސީއަށް ބަދަލުތަކެއް ގެންނަވައިގެން އަލުން ވެރިކަމަށް އައުމަށް މަސައްކަތްތަކެއް ކުރައްވާނެކަމަށްވެސް ވިދާޅުވެފަ އެވެ. މިކަމަށް ރައްދު ދެއްވަމުން ރައީސް ޞާލިހު ވިދާޅުވީ ގާނޫނު ބަދަލުކޮށްގެން ވިޔަސް ވެރިކަމަށް ވަޑައިގަންނަވަން އުޅުއްވަނީ ކޮން ބޭފުޅެއްކަން ރައްޔިތުން ވިސްނަވަންޖެހޭ ކަމަށެވެ. ނަޝީދު އުޅުއްވަނީ ކޮންމެ ގޮތަކުން ވިޔަސް ވެރިކަން ހޯއްދަވަން ކަމަށާއި ވެރިކަން ނޫން އެހެން ވާހަކައެއް އެމަނިކުފާނަށް ނުވެސް ދެއްކެވޭކަމަށް ރައީސް ޞާލިހު ވިދާޅުވި އެވެ.
ރައީސް ނަޝީދު ބަރުލަމާނީ ނިޒާމަށް ތާއީދުކުރައްވާތީ އެކަމަށްވެސް ރައިސް ޞާލިހު ފާޑު ވިދާޅުވި އެވެ. އެގޮތުން ބަރުލަމާނީ ނިޒާމަށް ތާއީދު ކުރައްވާނަމަ ރިޔާސީ ނިޒާމެއްގެ ތެރެއިން ބާއްވާ އިންތިހާބަކަށް ކުރިމަތިނުލީސްކަމަށް ރައީސް ޞާލިހު ވިދާޅުވި އެވެ.
"އަޅުގަނޑަކީ ރިޔާސީ ނިޒާމަށް ތާއިދު ކުރާ މީހެއް. އެހެންވެ ރިޔާސީ އިންތިހާބެއްގައި ކުރިމަތިލައިގެން މިހުރީ. ބަރުލަމާނީ ނިޒާމަށް އަޅުގަނޑު ތާއީދު ކުރާނަމަ އަޅުގަނޑު ރިޔާސީ އިންތިހާބަކަށް ކުރިމައްޗެއް ނުލީސް" ރައީސް ޞާލިހު ވިދާޅުވި އެވެ.
ރާއްޖޭގައި ގިނަ ސިޔާސީ ޕާޓީތައް އެކުލެވޭ ނިޒާމު އުފެދުނީއްްސުރެއް އެމްޑީޕީން ވަކާލާތު ކުރަމުން ދަނީ ބަރުލަމާނީ ނިޒާމެއް ރާއްޖެ ގެނައުމަށެވެ. އެހެންނަމަވެސް މިއަދު އެޕާޓީގެ އެންމެ އިސް ލީޑަރު މިވަނީ ބަރުލަމާނީ ނިޒާމަށް ތާއީދު ނުކުރައްވާކަން ފާޅުކަން ބޮޑު ގޮތެއްގައި އިއުލާން ކުރައްވައިފަ އެވެ.
ރައީސް މުހައްމަދު ނަޝީދު ތަކުރާރުކޮށް ވިދާޅުވަމުން ގެންދަވަނީ ރައީސް ޞާލިހުގެ އަރިހުގައި މަސައްކަތް ކުރައްވަނީ ޑީއާރުޕީ ފިކުރުގެ މީހުން ކަމަށެވެ. އަދި މިހާރު އެމްޑީޕީގެ ތެރެއިން އެމްޑީޕީގެ އަސްލު ފިކުރު ފޮހެވިގެން ދާކަމަށްވެސް ރައީސް ނަޝީދު ގެންދަވަނީ ވިދާޅުވަމުންނެވެ.
