ވެރިއެއްގެ ތައްޕާހުން ލިބޭނީ އަޅުވެތިކަން: ރައީސް ނަޝީދު
ވެރިއެއްގެ ތައްޕާހުން ލިބޭނީ އަޅުވެތިކަން އެކަނި ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީ ރިޔާސީ ޕްރައިމަރީގެ ކެމްޕެއިންގައި މާލޭގެ ރާޅުގަނޑު ސަރަހައްދުގައި މިހާރު ކުރިޔަށްދާ ޖަލްސާގައި ވާހަކަފުޅުދައްކަވަމުން ނަޝީދު ވިދާޅުވީ ރައީސް އިބްރާހިމް މުޙައްމަދު ޞާލިޙަށް މި އިންތިހާބު ކާމިޔާބު ކުރެވޭނެ އެއްވެސް މަގެއް ނެތް ކަމަށެވެ.
އަދި ޑިމޮކްރަސީގެ އަސާސްތަކާ ހިލާފުވާތަން މިހާރު ފެންނަމުންދާ ކަމަށާއި އެމްޑީޕީން ރައްޔިތުންނަށް ފޯރުކޮށްދެމުން ދަނީ ޤާނޫނުން އަންގަވާފައިވާ ކަންތައްތައް ކަމަށެވެ. އަދި ހިދުމަތްތަކާއި ތަރައްގީ ލިބޭނީ ވެރިއެއްގެ ކައިރީގައި އެނބުރިގެން ނޫން ކަަމަށާއި އެއީ އަމިއްލަ ހިތްވަރުން ލިބޭނެ ކަންތައްތައް ކަމަށް ރައީސް ނަޝީދު ވިދާޅުވިއެވެ.
”މިދިޔަ 18 އަހަރު އަޅުގަނޑުމެން މިދަނީ ރައްޔިތުންނަށް ފޯރުކޮށްދެމުން ގާނޫނުން. އެއްވެސް ހާލެއްގަ ވެރިއެއްގެ ގާތުގަ އެނބުރިގެން ތިބޭފުޅުން ވެރިއެެއްގެ ގޭގެ ވަޅުދިޔަ ހިއްކާލަދީގެން، ނޫނީ ބާޒާރުކޮށްދީގެން އެގޭގެ ނޯކިރީއަކަށް ވެގެން ލިބޭނެ އެއްޗެއް ނޫން” ރައީސް ނަޝީދު ވިދާޅުވިއެވެ.
މީގެ އިތުރުން ކަންތައްތައް ހާސިލް ކުރެވޭނީ ވެރިން ރުއްސައިގެން ކަމަށް ގިނަ މީހުން ދެކޭ ކަމަށާއި ވެރިއެއްގެ ތައްޕާހުން ލިބޭނެ ހަމައެކަނި އެއްޗަކީ އަޅުވެތިކަން ކަމަށް ރައީސް ނަޝީދު ވިދާޅުވިއެވެ.
“އެއީ ތިބޭފުޅުންގެ އިހްތިޖާޖުން އަމިއްލަ މަސައްކަތްޕުޅުން ލިބޭނެ އެއްޗެއް. މާގިނަ މީހުންނަށް ހީވާން ފަށައިފި ކަމެއް ވާން އޮތީ ވެރިން ރުއްސައިގެނޭ. ނޫން. ވެރިއެއްގެ ތައްޕާހުން ލިބޭނީ އެންމެ ކަމެއް. އަޅުވެތިކަން އެކަނި” ރައީސް ނަޝީިދު ވިދާޅުވިއެވެ .
ރައީސް ނާޝީދު ވިދާޅުވީ އެމްޑީޕީ އަކީ އަމިއްލަ މަސައްކަތުން އަމިއްލަ ހިތްވަރުން ބޭނުންތައް ފުއްދަމުންދާ ޕާޓީއެއް ކަމަށެވެ. އަދި ކުރިޔަށް އޮތް ތަނުގައިވެސް އެމްޑީޕީ ކުރިޔަށްދާނީ އެ މަގުން ކަމަށް ރައީސް ނަޝީދު ވިދާޅުވިއެވެ.
