ރޮޒޭ ރައީސް ނަޝީދަށް: ދޮގު ހަދައިފައި، އެހާ ފަސޭހައިން ސަލާމަތެއް ނުވެވޭނެ
މި ޒަމާނުގައި، ބޮޑެތި ދޮގު ހައްދަވައިފައި އެހައި ފަސޭހައިން ސަލާމަތް ނުވެވޭނެ ކަމަށް ވިދާޅުވެ، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު، އަދި އެމްޑީޕީގެ އަންހެނުންގެ ރޫޙުގެ ރައީސާ، އެމްޑީޕީގެ ރައީސް މުޙައްމަދު ނަޝީދަށް ރައްދު ދެއްވައިފިއެވެ.
އެމްޑީޕީގެ ރިޔާސީ ޕްރައިމަރީގެ ކެމްޕެއިންގެ ތެރެއިން، އިއްޔެ ލ.އިސްދޫގައި ބޭއްވި ޖަލްސާގައި ވާހަކަފުޅުދައްކަވަމުން، ރައީސް ނަޝީދު ވިދާޅުވީ މީގެކުރިޔާ ހިލާފަށް މިހާރު ބަޣާވާތަކާ ދިމާލަށް މިސްރާބު ނުޖަހައި އޮތް މައިގަނޑު ސަބަބަކީ ރައްޔިތުންގެ މަޖިލީހުގެ 65 ގޮނޑި އެމްޑީޕީ އަށް ލިބިފައި އޮތުމުން ކަމަށެވެ.
މިދިޔަ ރައްޔިތުންގެ މަޖިލީހުގެ އިންތިޚާބުގައި، ރައީސް އިބްރާހީމް މުޙައްމަދު ޞާލިޙު އެދިވަޑައިގެންނެވީ، އެމްޑީޕީ މަދު ގޮނޑިކޮޅަކަށް ވާދަކުރެއްވުމަށް ކަމަށާއި އެކަން އެގޮތަށް ކުރި ނަމަ އެމްޑީޕީ އަށް 65 ގޮނޑިއެއް ވެސް އަދި ބަޣާވާތް ވެސް އޮންނާނީ ތުންފަތް މަތީގައި ކަމަށްވެސް ރައީސް ނަޝީދު ވިދާޅުވިއެވެ.
ރައީސް ނަޝީދުގެ މި ވާހަކަފުޅުތައް ދޮގު ކުރައްވައި، ރޮޒައިނާ ކުރެއްވި ޓްވީޓެއްގައި ވިދާޅުވެފައިވަނީ މަޖިލީހުގެ ހުރިހައި ގޮނޑިއަކަށް، އެމްޑީޕީން ވާދަކުރިޔަ ނުދިނުމަށް މަސައްކަތް ކުރެއްވީ ރައީސް ނަޝީދު ކަމަށެވެ.
ރޮޒައިނާ ވަނީ "މިއޮތީ ހެކި" ކަމަށް ވިދާޅުވެ، 2019 ވަނަ އަހަރުގެ ރައްޔިތުންގެ މަޖިލީހުގެ އިންތިޚާބުގައި، އެމްޑީޕީން 87 ގޮނޑިއަށް ވާދަ ކުރަން ފެނިވަޑައިނުގަންނަވާ ކަމަށް ރައީސް ނަޝީދު އެމްޑީޕީގެ ޤައުމީ މަޖިލީހުގައި ވިދާޅުވާ މަންޒަރު ފެންނަ ވީޑިއޯއެއްވެސް ހިއްސާ ކުރައްވައިފައެވެ.
ރޮޒައިނާ ވިދާޅުވީ އެ ފަހަރު، ހުރިހައި ގޮނޑިއަކަށް ވާދަ ކުރެވުނީ އެމްޑީޕީގެ ޤައުމީ މަޖިލީހުން އެކަމަށް ހިފައިލުމުން ކަމަށެވެ.
