މިޞްރުގެ ރައީސް އިންޑިއާއަށް!
މިސްރުގެ ރައީސް އަބްދުލް ފައްތާޙް އަލް ސީސީ އިންޑިޔާއަށް ރަސްމީ ދަތުރުފުޅެއް ކުރައްވާ ގޮތަށް ހަމަޖެހިއްޖެއެވެ. މިމަހުގެ 24ން 26ށް ކުރައްވާގޮތަށް ހަމަޖެހިފައިވާ މި ދަތުރުފުޅުގައި އިންޑިޔާގެ ޖުމްހޫރީ ދުވަހުގެ މުނާސަބަތުގައި ބާއްވާ އިޙްތިފާލްތަކުގައި ސީސީ ޚާއްސަ މެހްމާނެއްގެ ގޮތުން ބައިވެރިވެވަޑައިގަންނަވާނެއެވެ.
ސީސީ އަށް ރަސްމީކޮށް މަރުހަބާ ދެންނެވުން އޮންނާނީ ޖަނަވަރީ 25 ވަނަ ދުވަހު ރިޔާސީ ގަނޑުވަރު ރަޝްތުރަޕަތީ ބަވަން ގައެވެ. ހަމަ އެދުވަހު ބޮޑުވަޒީރު ނަރެންދުރަމޯދީއާ ބައްދަލުކުރައްވާ ރަސްމީ ވާހަކަފުޅުތައް ބޭއްވުމަށް ވަނީ ހަމަޖެހިފައެވެ. ރަސްމީ ވާހަކަފުޅުތަކަށްފަހު ދެގައުމުން 6 އެއްބަސްވުމެއްގައި ސޮއިކުރުމަށް ވެސް ވަނީ ހަމަޖެހިފައެވެ. ދެގައުމުން އެއްބާރުލުން އިތުރު ކުރުމަށް ނިންމާފައިވާ ދާއިރާތަކުގެ ތެރޭގައި އެގްރިކަލްޗަރ، ޑިފެންސް، އެޑިޔުކޭޝަން، އަދި ކައުންޓަރ ޓެރަރިޒަމް ހިމެނެއެވެ.
އިންޑިޔާގެ ޖުމްހޫރީ ދުވަހުގެ އިހްތިފާލްތައް އޮންނާނީ ޖެނުއަރީ 26 ވަނަ ދުވަހު ވެރިރަށް ޑެއްލީގައެވެ. އޭގެ ފަހުން ބޭންގަލޫރުގައި އޮންނަ އެއިރޯ އިންޑިޔާ 2023 އެއާފޯސް ޝޯއެއްވެސް ސީސީ ބައްލަވާލައްވާނެއެވެ.
މިފަހަރުގެ ދަތުރުފުޅުގައި މަޝްވަރާކުރެވޭނެ މުހިންމު އެއް ދާއިރާއަކީ ތައުލީމީ ދާއިރާއެވެ. އިންޑިޔާގެ އިންސްޓިޓިއުޓް އޮފް ޓެކްނޮލޮޖީ (އައި.އައި.ޓީ) ތައް ފަދަ ހަޔަރ އެޑިއުކޭޝަން ބިނާއެއް އިންޑިޔާއިން މިސްރުގައި އެޅުމަށް މިސްރުން ބޭނުން ވެއެވެ.
Ads by STO
