އިންތިޚާބު އޮޅުވައެއް ނުލެވޭނެ، އެތެރޭގެ އިންތިޒާމް އެއަށްވުރެ ރަނގަޅު: ރައީސް
މިއަދު ކުރިއަށްދާ އެމްޑީޕީ ރިޔާސީ ޕްރައިމަރީގެ އިންތިޚާބުގެ ވޯޓު އޮޅުވާ ނުލެވޭނެކަމަށާއި ޕާޓީގެ އެތެރޭގެ އިންތިޒާމުތައް އެއަށްވުރެ ފުރިހަމަ ކަމަށް، މި އިންތިޚާބުގައި ވާދަކުރައްވާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ ޕްރައިމަރީ އިންތިޚާބުގައި ވޯޓުލެއްވުމަށްފަހު ނޫސްވެރިންނަށް މަޢުލޫމާތު ދެއްވަމުން ރައީސް ވިދާޅުވީ އެމްޑީޕީން މިހައިތަނަށްވެސް އެއްވެސް އިންތިހާބެއް އޮޅުވައިލައިފައިނުވާ ކަމަށެވެ.
"އަޅުގަނޑަކަށް ހީއެއްނުވޭ އެކަހަލަ އެއްވެސް ކަމެއް ހިނގާނެހެން އެމްޑީޕީގެ އެތެރޭގެ އެއްވެސް އިންތިޚާބެއްގައި އެކަހަލަ ކަމެއް އަދިއެއް ހިނގާފައެއް ނެތް. މިފަހަރަކުވެސް ހިނގާތަނެއް އަޅުގަނޑަކަށް ނުފެނޭ، ޕާޓީގެ އެތެރޭގެ އިންތިޒާމުތައް ހަމަޖެހިފައި ހުރި އެއަށްވުރެ ރަނގަޅަށް" ރައީސް ވިދާޅުވިއެވެ.
ރައީސް އިތުރަށް ވިދާޅުވީ މިއަދު ކުރިއަށްދާ އެމްޑީޕީ ޕްރައިމަރީ ރާއްޖޭގެ ޑިމޮކްރަސީގެ ހަޔާތުގައި އަނެއްކާވެސް އާ މަންޒަރެއް ފެނިގެން ދާނެކަމަށެވެ. އުއްމީދަކީ މިއަދުގެ މިވޯޓް ނިމިގެންދާއިރު ޑިމޮކްރަސީގެ ހިތްހަމަޖެހޭ މަންޒަރެއް ފެނިގެންދިޔުންކަމަށާއި، ސުލްޙަވެރިކަމާއެކުގައި މިއަދުގެ ވޯޓް ނިމި، އަނެއްކާވެސް އެކުގައި މަސައްކަތް ކުރުމުގެ ފުރުސަތު ލިބިގެން ދިޔުން އެދޭކަމަށްވެސް އެމަނިކުފާނު ވަނީ ފާހަގަކުރައްވައިފައެވެ.
އެމްޑީޕީގެ ރިޔާސީ ޕްރައިމަރީގެ ވޯޓު އޮޅުވައިނުލެވޭނެ ކަމަށް ރައީސް ވިދާޅުވިޔަސް، އެމަނިކުފާނުގެ ވާދަވެރި ކެންޑިޑޭޓް ރައީސް މުޙައްމަދު ނަޝީދުގެ ކެމްޕޭން ޓީމުން ވަނީ އިންތިހާބު އޮޅުވައިލުމުގެ މަސައްކަތް ކުރަމުންދާކަމުގެ މަޢުލޫމާތު ލިބެމުން އަންނަކަމަށް ވިދާޅުވެފައެވެ.
އިންތިޚާބު އިންސާފުވެރިވާނީ ރައީސް ނަޝީދަށް ކާމިޔާބު ވެއްޖެނަމަ. އެނޫން ހާލަތެއްގައި އިންސާފުވެރި ކަމަކަށް ނުވާނެ. ބަލަންްތިބޭ.