އަމީނީ މަގުގައި ހުރި ގަސްތައް ވަނީ ހުޅުމާލެއާ ކުޑަގިރިއަށް ބަދަލު ކޮށްފައި: އަސްލަމް
އަމީނީ މަގުން ކެނޑި ގަސްތައް ހުޅުމާލެއާއި ކުޑަގިރިއަށް ގެންގޮސް އިންދާފައިވާ ކަަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އަމީނީ މަގުގައި ހުންނަ ގަސްތައް ކަނޑާ މައްސަލައިގައި ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ކުރެއްވި ސުވާލަކަށް ޖަވާބު ދެއްވަމުން އަސްލަމް ވިދާޅުވީ ގަސްތައް ކެނޑުމަކީ ސަރުކާރުގެ ސިޔާސަތެއް ނޫން ކަމަށާއި އެކަން ކުރަނީ ސަބަބުތަައް މެދުވެރިވެގެން ކަމަށެވެ.
މިނިސްޓަރު ވިދާޅުވި ގޮތުގައި އަމީނީ މަގުގައި ހުރި ގަސްތަކަކީ އޮފިއެލޭ ގަސްތައް ކަމަށާއި، ދުނިޔޭގެ އެހެން ޤައުމުތަކުގައިވެސް އެގަސްތައް ނުކަނޑައި އެފަދަ މަޝްރޫޢުތައް ނުހިންގާ ކަމަށެވެ.
"މިހާރަކަށް އައިސް، 2005 ވަނަ އަހަރުން ފެށިގެން، ގަސްތައް ބޭނުންކުރާ އެހެން ޤައުމުތަކުގައިވެސް އެގަސްތައް އެހެން އެއްޗަކަށް ރީޕްލޭސް ކުރުމުގެ މަސައްކަތް ކުރިއަށްދޭ. އެހެންވީމަ، ސަރުކާރުގެ ސިޔާސަތެއްގެ ދަށަކުންނެއް ނޫން އަޅުގަނޑުމެން އެ ގަސްތައް ކަނޑަނީކީއެއް، ޕްރެކްޓިކަލް ރީޒަންއަށް ގަސްތައް ކަނޑަމުން ގެންދަނީ. ކެނޑި ގަސްތައް އަޅުގަނޑުމެން ވާނެ ހުޅުމާލޭގައާއި، ކުޑަގިރީގަ އިންދާފަ."
އަސްލަމް ވިދާޅުވީ ވަކި އަދަދެއްގެ ގަސްތައް ކެނޑުމުގެ ވިސްނުމެއް ނެތް ކަަމަށާއި، ކަނޑަން ޖެހޭ ގަސްތައް އެހެން ހިސާބުތަކަށް ބަދަލު ކުރާނެ ކަމަށެވެ.
އަދި އަމީނީ މަގު ތަރައްޤީ ކުރާއިރު އައު ގަސްތަކެއް ޖަހާނެ ކަމަށްވެސް ވަނީ ވިދާޅުވެފައެވެ.
ހަސަން ލަތީފު ވަނީ އަމީނީ މަގުގެ މަސައްކަތް އެއްކޮށް ނިންމައިލެވޭނެ ތާރީޚަކާއި، މި ސަރުކާރުން މާލޭގެ ކިތައް މަގު ތަރައްޤީ ކުރަން ނިންމާފައިވޭތޯ ސުވާލު ކުރައްވައިފައެވެ.
ޖަވާބުގައި އަސްލަމް ވިދާޅުވީ ކުރިން ޕްލޭން އޮތީ މި އަހަރުގެ ފެބްރުއަރީ މަސް ނިންމަންވާއިރަށް މަސައްކަތް ނިންމަން ކަމަށެވެ. ނަމަވެސް މަސައްކަތުގައި ދިމާވި ދަތިތަކާއެކުގައި މި އަހަރުގެ ސެޕްޓެމްބަރުމަހުގެ ނިޔަލަށް މަސައްކަތް ނިންމައިލެވޭނެ ކަމަށް އަސްލަމް ވިދާޅުވިއެވެ. އިތުރަށް އަސްލަމް ވިދާޅުވީ އަމީނީ މަގު ފިޔަވައި އިތުރު މަގެއް ހެެދުމަށް އާރްޑީސީއާ ހަވާލު ކުރެވިފައިނުވާ ކަމަށެވެ.
Ads by STO
