ފައްޔާޒްގެ މައްސަލައިން އެނގިގެން ދަނީ އެމްޑީޕީ ތެރޭގައި ބަޣާވާތް އަށަގެންފައިވާ މިންވަރު: ޖަމީލު
އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުބާރު ނެތްކަމުގެ މައްސަލައިން އެނގިގެން ދަނީ އެމްޑީޕީ ތެރޭގައި ބަޣާވާތް އަށަގެންފައިވާ މިންވަރު ކަމަށް ކުރީގެ ނައިބު ރައީސް އަދި ޕީޕީއެމްގެ ހާއްސަ އެޑްވައިޒަރު ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ފައްޔާޒުގެ މައްޗަށް އިތުބާރުނެތްކަމުގެ ވޯޓު ނެގުމަށް އެމްޑީޕީގެ ލީޑާޝިޕް ހިމެނޭ ގޮތަށް މަސައްކަތް ކުރަމުންދާކަން ހާމަ ކުރީ އިއްޔެ އެވެ. އެ މަސައްކަތުގައި އިސްކޮށް އުޅުއްވާ މަޖިލީސް މެމްބަރުން ފާޅު އަދި ނުނިކުންނަވާއިރު އެ މައްސަލަ މަޖިލީހަށް ހުށަހަޅަން ބޭނުންވާ ވަރަށް ސޮއި ލިބިފައިވާ ކަމަށް އެ މެމްބަރުން ވިދާޅުވެ އެވެ.
މިކަމާ ގުޅިގެން ޖަމީލު ކުރެއްވި ޓްވީޓެއްގައި ވިދާޅުވީ އެމްޑީޕީން މެޖޯރިޓީ ހޯދި އަސްލު މަގްސަދު ފަޅާއަރަމުންދާ ކަމަށާއި ވެރިކަމުގެ ތެރެއިން ފެންނަނީ ރައްޔިތުންނަށް ކަމެއް ނުކޮށްދީ، އަމިއްލަ ޖާހަތު ބޮޑުނުވެވިގެން އުޅޭތަން ކަމަށެވެ.
"މިފެންނަނީ ޕާޓީ ތެރޭގައި ބަޣާވާތް އަށަގެންފައިވާ މިންވަރު. ވެރިކަމާ ހަވާލުވެތިބި މީހުން ކުފޫ ހަމަނުވާކަން މިހާމަވަނީ." ޖަމީލް ވިދާޅުވިއެވެ.
