ޗައިނާއިން ރަޝިޔާއަށް އެހީވުމަކީ ބޮޑު ގޯހަކަށް ވާނެ: އެމެރިކާ
ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގައި ޗައިނާއިން ރަޝިޔާއަށް އަސްކަރީ ގޮތުން އެހީތެރިކަން ފޯރުކޮށްދިނުމަކީ ހެދޭނެ އެންމެ ބޮޑު ގޯހަށް ވާނެ ކަމަށް ވިދާޅުވެ، އެމެރިކާގެ ޚާރިޖީ ވަޒީރު އެންތަނީ ބްލިންކަން ޗައިނާއަށް އިންޒާރު ދެއްވައިފިއެވެ. އޭނާ މި މޭރުމުން ވާހަކަފުޅު ދައްކަވާފައި ވަނީ ޗައިނާގެ ޚާރިޖިއްޔާ އެންމެ އިސްވެރިޔާ ވޮންގް ޔީއާ އެކު ބޭއްވި ބައްދަލުވުމެއްގައެވެ.
ދެ ބޭފުޅުން ބައްދަލުކުރައްވާފައި ވަނީ ޖަރުމަނުވިލާތުގެ މިޔުނިކްގައި ކުރިއަށްދިޔަ މިޔުނިކް ސެކިޔުރިޓީ ކޮންފަރެންސްގެ ހަވާސާގައެވެ. އެ ބައްދަލުވުމަށް ފަހު ދެއްވި ބަސްދީގަތުމެއްގައި ބްލިންކަން ވިދާޅުވީ، ރަޝިޔާއަށް މާއްދީ ގޮތުންނާއި އަސްކަރީ ގޮތުން އެހީތެރިކަން ފޯރުކޮށްދިނުމަށް ޗައިނާއިން ވިސްނަމުންދިޔުމަކީ އެމެރިކާއިން ކަންބޮޑުވާ ކަމެއް ކަމުގައެވެ.
އެ ބައްދަލުވުމުގައި ޔީ ވަނީ ޗައިނާގެ ޖާސޫސީ ބެލޫންއެއް އެމެރިކާއިން ވައްޓައިލާފައިވާތީ އެ ކަމާ ނުރުހުން ފާޅުކުރައްވާފައެވެ. އެއީ ވަރަށް ހަމަނުޖެހޭ އަމަލެއްގެ ގޮތުގައި ޔީ ސިފަކުރެއްވިއެވެ. އެ ބެލޫން ނުވަތަ ފުއްޕާހަމަކީ ޖާސޫސީ އާލަތްތައް ހަރުކޮށްފައިވާ އެއްޗެއް ނޫން ކަމަށާއި، އެއީ މޫސުމީ ދިރާސާތައް ކުރުމަށް ބޭނުންކޮށްފައިވާ ފުއްޕާހަމެއް ކަމުގައި ޗައިނާއިން މީގެ ކުރިން ވަނީ ބުނެފައެވެ.
ފުއްޕާހަމުގެ މައްސަލައިގައި ދެ ޤައުމުގެ ދެމެދުގައި އޮތް ގުޅުން ވަނީ ހީނަރުވެފައެވެ. އަދި ޗައިނާއަށް ކުރެއްވުމަށް ހަމަޖެހިފައި އޮތް ދަތުރުފުޅެއް ވެސް ބްލިންކަން ވަނީ ފަސްކުރައްވާފައެވެ. މި ހާދިސާ ހިނގާފައި ވަނީ، ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގައި ޗައިނާއިން އަމަލުކުރަމުންދާ ގޮތެއް އެމެރިކާއިން ބަލަމުންދާ ދަނޑިވަޅެއްގައެވެ.
އެން.ބީ.ސީ.ގެ "މީޓް ދަ ޕްރެސް"އަށް ދެއްވި ބަސްދީގަތުމުގައި ބްލިންކަން ވިދާޅުވީ ޔޫކްރެއިން ހަނގުރާމައިގައި ބޭނުންކުރުމަށް ރަޝިޔާއަށް ނުރައްކާތެރި ހަތިޔާރު ފޯރުކޮށްދިނުމާ މެދު ޗައިނާއިން ވިސްނަމުންދާ ކަމުގައެވެ. އަދި، އެއީ ވަރަށް ކަންބޮޑުވާ މައްސަލައެއް ކަމުގައި ޔީ އަރިހުގައި ދަންނަވާފައިވާނެ ކަމަށާއި، އެ ފަދަ އަމަލެއް ހިންގައިފިނަމަ، ދެ ޤައުމުގެ ދެމެދުގައި އޮތް ގުޅުންތަކަށް އިތުރަށް ނުރަނގަޅު އަސަރު ކުރާނެ ކަމުގެ އިންޒާރު ދެއްވާފައިވާ ކަމުގައެވެ.
މި ކަމާ ގުޅޭ ގޮތުން އެމެރިކާގެ ޚާރިޖިއްޔާގެ އިސް އޮފިޝަލެއް ވިދާޅުވީ، ޔޫކްރެއިން ހަނގުރާމައާ ގުޅޭ ގޮތުން ޗައިނާއިން ސުލްޙަ ޤާއިމުކުރުމާ މެދު ފާޅުގައި ވާހަކަދެއްކި ނަމަވެސް، އެ ޤައުމުން ރަޝިޔާއަށް ނުރައްކާތެރި ހަތިޔާރު ފޯރުކޮށްދޭން ވެސް ބޭނުންވާ ކަމުގައެވެ. އަދި، ރަޝިޔާއަށް އެހީތެރިކަން ފޯރުކޮށްދޭން ޗައިނާއިން މަސައްކަތް ކުރަމުންދާ ކަމުގައި ވެސް އެ އޮފިޝަލު ވިދާޅުވިއެވެ.
"މި ކަމާ ގުޅޭ ގޮތުން ބްލިންކަން ވަނީ ވޮންގްއަށް ވަރަށް ހޫނު އިންޒާރެއް ދެއްވާފައި. އަދި، ޗައިނާއިން ރަޝިޔާއަށް ހަތިޔާރު ފޯރުކޮށްދީފި ނަމަ، ނުވަތަ އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުން ރެކެން އެހީތެރިވެދީފި ނަމަ، ޗައިނާއާއި އެމެރިކާއާއި ދެމެދު އޮތް ގުޅުމަށް ވަރަށް ބޮޑަށް އަސަރު ކުރާނެ ކަމަށް ވިދާޅުވެފައި،" ޚާރިޖީ ވުޒާރާގެ އޮފިޝަލް ވިދާޅުވިއެވެ.
ރަޝިޔާއިން ޔޫކްރެއިނަށް ސިފައިން ފޮނުވައިގެން ހަނގުރާމަކުރަން ފަށާފައި ވަނީ 2022 ވަނަ އަހަރު ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމަ ފެށުމުގެ ކުޑަ ދުވަސްކޮޅެއް ކުރިން ރަޝިޔާއާއި ޗައިނާއިން ވަނީ އެކި ދާއިރާތަކުން ގުޅުން ބަދަހިކުރުމަށް އެއްބަސްވުމެއް އެކުލަވައިލާފައެވެ. އަދި، އެ އެއްބަސްވުމަށްފަހު، ދެ ޤައުމުގެ ދެމެދުގައި އޮތް އިޤުތިޞާދީ އަދި ވިޔަފާރީގެ ގުޅުންތައް އިތުރަށް ބަދަހިކޮށްފައިވާ ކަން ފާހަގަކުރެވެއެވެ.
ރަޝިޔާގެ ހަނގުރާމަ ޗައިނާއިން އަދި މިހާތަނަށް ކުށްވެރިކޮށްފައެއް ނުވެއެވެ. އަދި، ޚިޔާރުކޮށްފައި ވަނީ މެދުމިނުގެ ސިޔާސަތެކެވެ. ނަމަވެސް، ރަޝިޔާއިން ޔޫކްރެއިންގެ މައްޗަށް ކުރިހޯދައިފިނަމަ، ތައިވާނާ މެދު އެ ފަދަ ގޮތަކަށް އަމަލު ކުރުމަށް ޗައިނާއަށް އިތުރު ހިތްވަރެއް ލިބިގެންދާނެ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
ނަމަވެސް، މިޔުނިކް ސެކިޔުރިޓީ ކޮންފަރެންސްގައި ވާހަކަފުޅު ދައްކަވަމުން ވޮންގް ވަނީ ސުލްޙައިގެ މަގު އިސްކުރުމަށް ހުރިހާ ފަރާތަކަށް ގޮވައިލައްވާފައެވެ. އަދި، ހަމަޖެހުމަށް އިސްކަން ދިނުމަށް ވިލާތުގެ ޤައުމުތަކުގެ ކިބައިން އެދިވަޑައިގަންނަވާފައެވެ. އަދި، ހަމަނުޖެހުމަށް މަގުފަހިކޮށް، ހަނގުރާމަ ދިގުދެންމުމަށް ބައެއް ފަރާތްތަކުން މަސައްކަތް ކުރަމުންދާ ކަމުގައި ވެސް އޭނާ ތުހުމަތުކުރެއްވިއެވެ.
ޔޫކްރެއިނުގައި ކުރަމުންދާ ހަނގުރާމައިގައި ޗައިނާއިން ރަޝިޔާއަށް އެހީވުމަކީ ގޯހަކަށް ވާނެ ކަމުގައި ބްލިންކަން ވިދާޅުވެފައިވާއިރު، އެމެރިކާއާއި ނޭޓޯގެ އެހެން ބާރުތަކުން ދަނީ ޔޫކްރެއިން ސިފައިންނަށް އަސްކަރީ އެހީތެރިކަން ފޯރުކޮށްދެމުންނެވެ. ބަރުހަތިޔާރާއި، ހަނގުރާމަތީ ޓޭންކުފަހަރާއި، އެހެނިހެން އުޅަނދުފަހަރުގެ އިތުރުން ރޮކެޓާއި މިސައިލް ވެސް ފޯރުކޮށްދެމުންނެވެ. އަދި، އެ ޤައުމުގެ ސިފައިންނަށް އަސްކަރީ ތަމްރީނު ފޯރުކޮށްދެމުންނެވެ.
