މިއަހަރު ރާއްޖެއިން މީހުން ހައްޖަށް ގެންދިޔުމަށް 1000 ކޯޓާ ލިބިއްޖެ
މިއަހަރު ރާއްޖެއިން މީހުން ހައްޖަށް ގެންދިޔުމަށްޓަކައި ސައުދީ ސަރުކާރުން ދެއްވާ ރަސްމީ 1000 ކޯޓާ މިހާރު ލިބިފައިވާކަމަށް އިސްލާމިކް މިނިސްޓަރ ޑރ. އަޙްމަދު ޒާހިރު ވިދާޅުވެއްޖެއެވެ.
މިނިސްޓަރ މިއަދު ކުރެއްވި ޓްވީޓެއްގައި ވިދާޅުވީ އިތުރު ކޯޓާ ހޯދުމަށް މަސައްކަތް ކުރައްވަމުން އަންނަ ކަމަށެވެ.
"ސައުދީ ސަރުކާރުން ދިވެހި ރާއްޖެއަށް ދެއްވާ ރަސްމީ 1000 ހައްޖު ކޯޓާ މިހާރު ވަނީ ލިބިފައި. އިތުރު ކޯޓާ ހޯދުމުގެ މަސައްކަތް މިގެންދަނީ ކުރަމުން" އިސްލާމިކް މިނިސްޓަރ ވިދާޅުވިއެވެ.
މިއީ ކޮވިޑް-19 ގެ ހާލަތަށް ފަހު ރާއްޖެއިން މީހުން ހައްޖަށް ގެންދިޔުމަށް 1000 ކޯޓާ ލިބުނު ފުރަތަމަ ފަހަރެވެ.
ކޯވިޑްގެ ކުރިން ޙައްޖުގެ އަޅުކަމަށް ފުރުސަތު ދިން އަދަދަށްް މިއަހަރުގެ ޙައްޖުގައި ފުރުސަތުދޭނެ ކަން ސައުދީ ސަރުކާރުން މިއަހަރު ވަނީ ހާމަކޮށްފައެވެ.
ކޮވިޑް-19އާ ގުޅިގެން މިދިޔަ ހައްޖުވުމުގެ ފުރުސަތު ދިނުމަށް ސައުދީ ސަރުކާރުން ނިންމަވައިފައި ވަނީ ޖުމްލައެއް މިލިއަން މީހުންނަށެވެ. އޭގެ ތެރެއިން 850،000 ފުރުސަތު ދީފައިޚާއްސަކޮށްފައި ވަނީ ބޭރު ގައުމުތަކުގެމީހުންނަށެވެ. ސައުދީ ރައްޔިތުންނަށް ކަނޑައަޅައިފައި ވަނީ 150،000 ކޯޓާއެވެ. އަދި ރާއްޖެއަށް ދޫކޮށްފައި ވަނީ، 453 ކޯޓާއެވެ.
ސައުދީ ސަރުކާރުން ބުނީ މި އަހަރު ޙައްޖުގައި ބައިވެރިވުމަށް ވަކި އުމެރެއް ނޯންނާނެކަމަށާއި ކޯވިޑަށްް ޓެސްޓްކޮށް ސާމްޕަލްތައް ހެދުންވެސް ނޯންނާނެކަމަށެވެ.
