ފައްޔާޒާ ދެކޮޅަށް 30 މެމްބަރުން ނިކުމެއްޖެ، އަޅުގަނޑުވެސް މިނިކުތީ: ނަޝީދު
އިކޮނޮމިކް މިނިސްޓަރު ފައްޔާޒާ ދެކޮޅަށް 30 މެމްބަރުން ނިކުމެއްޖެ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު އިސްވެ ހުންނަވާ، އިކޮނޮމިކް މިނިސްޓަރު ފައްޔާޒުގެ އިތުބާރު ނެތް ކަމުގެ މައްސަލައެއް މަޖިލީހަށް ވެއްދުމަށް ޕާޓީ ތެރެއިން ދަނީ މަސައްކަތް ކުރައްވަމުންނެވެ. އެ މައްސަލައިގައި އެންމެ ފުރަތަމަ ސޮއި ކުރެއްވީ ވެސް ރައީސް ނަޝީދެވެ.
އެމްޑީޕީގެ ގައުމީ މަޖިލީހުގެ ރަސްމީ ވަޓްސްއަޕް ގުރޫޕުގައި ރައީސް ނަޝީދު ވިދާޅުވީ ފައްޔާޒުގެ އިތުބާރު ނެތް ކަމުގެ މައްސަލަ ހުށަހެޅުއްވުމުގައި އެމަނިކުފާނު ވެސް ބައިވެރިވެވަޑައިގަންނަވާ ކަމަށެވެ. އަދި އެ މައްސަލައިގައި ސޮއި ކުރެއްވި މަޖިލިސް މެމްބަރުންނާ ދިމާ ނުކުރުމަށް ނަޝީދު އެދިވަޑައިގެންނެވި އެވެ.
ހާއްސަކޮށް އެމްޑީޕީ ޕާލިމަންޓަރީ ގުރޫޕުގެ ލީޑަރު، މެދު ހެންވޭރު ދާއިރާ މެމްބަރު އަލީ އާޒިމް އާއި ޕީޖީގެ ނައިބު ހެންވޭރު ދެކުނު ދާއިރާ މެމްބަރު ހުސައިން ޝަމީމް (އަނދުން ހުސައިން)އާ ނުބެހުމަށް އެމަނިކުފާނު އެދިވަޑައިގެންނެވި އެވެ.
"ފައްޔާޒުގެ އިތުބާރު ނެތް ކަމަށް 30 މެމްބަރުން [ސޮއި ކުރިކަމަށް] ބުނުމުން ދެން ދިމާ ކުރަންވީ އެ މެމްބަރުންނާ ނޫން. އަޅުގަނޑުވެސް މި ނުކުތީ[އިތުބާރު ނެތް ކަމުގެ މައްސަލައިގައި]،" ނަޝީދު ފޮނުއްވި މެސެޖްގައިވެ އެވެ.
އެގޮތުން ރައީސް ނަޝީދު ވިދާޅުވީ މިހާރު ފެންނަމުންދާ މަންޒަރަކީ މިނިސްޓަރު ފައްޔާޒު ބޮޑުކަން ދައްކައި ނުފޫޒު ފޯރުވައިގެން ހުރިހައި ތަނަކަށް އަތްބާނާ މަންޒަރު ކަމަށެވެ. އަދި ނުފޫޒު ބޭނުން ކުރައްވައިގެން އެކިއެކި ފަރާތްތަކަށް ފައްޔާޒް ކޮންޓްރެކްޓްތައް ދީ ހައްދަވާ ކަމަށް ވެސް ރައީސް ނަޝީދު ވަނީ ތުހުމަތު ކުރައްވާފައެވެ.
"ފަޔާ ވެސް މި ޕާޓީތެރޭގައި ބްރޯ ވެގެން އުޅެގެން ނުވާނެ. ނިޒާމުތެރޭގައި އުޅުއްވާ،" ނަޝީދު ވިދާޅުވިއެވެ.
ރައީސް ނަޝީދު ކުރެއްވި ތުހުމަތުތަކަށް މިނިސްޓަރު ފައްޔާޒް ވަނީ ރައްދު ދެއްވާފައެވެ. އެގޮތުން ރައީސް ނަޝީދު އެމަނިކުފާނާއި ބެހޭ ގޮތުން ދައްކަވަނީ އެއްވެސް ހަގީގަތެއް ހުރި ވާހަކަތަކެއް ނޫން ކަމަށް ފައްޔާޒް ވިދާޅުވިއެވެ. އަދި ހަގީގަތާއި ހިލާފް ދޮގު ވާހަކަތައް ނުދެއްކެވުމަށް އިހުތިރާމާއިއެކު އެދިވަޑައިގަންނަވާ ކަމަށް ފައްޔާޒް ވަނީ ވިދާޅުވެފައެވެ.
"އަޅުގަނޑުގެ އިތުބާރު ނެތް ކަމުގެ މައްސަލަ ތަގުދީރުގައި ލިޔެވިފައިވާ އޮތް ގޮތަަކަށް ނިމިދާނެ. ހެޔޮ ބަސް ވިދާޅުވި ބޭފުޅުންނަށް ނިހާޔަތަށް ޝުކުރު ދަންނަވަން،" ފައްޔާޒު ވިދާޅުވި އެވެ.
ނަޝީދު އިސްވެ ހުންނަވައި ފައްޔާޒުގެ އިތުބާރު ނެތްކަމުގެ ވޯޓު މަޖިލީހަށް ވައްދަން މަސައްކަތް ކުރަމުންދާއިރު، މި މައްސަލައާއެކު އެމްޑީޕީގެ ތެރޭގައި ވަނީ ބައިބައިވުން އުފެދިގެން ގޮސްފައެވެ. އެގޮތުން ބައެއް މެމްބަރުން ސޯޝަލް މީޑިއާގައި އަންނަނީ ފައްޔާޒުގެ ދިފާއުގައި ވާހަކަދައްކަވަމުންނެވެ.
