ގައުމީ ހެދުމާއެކު ފްރީސްޓައިލަށް ނެށުމުން ކަމަކު ނުދިޔަ
މިހާރު ޖަރުމަނުވިލާތުގައި ކުރިއަށްދާ އައިޓީބީ ފެއާގައި ދިވެހި އަންހެނުންތަކެއް ދިވެހި ރަސްމީ ދިގު ހެދުމުގައި ފްރީ ސްޓައިލަށް ނެށުމުން އާންމުންގެ ފާޑުކިޔުން އަމާޒުވެއްޖެ އެވެ.
ސޯޝަލް މީޑިއާގައި އާންމުވެފައިވާ ވީޑިއޯއެއްގައި ފެންނަނީ ހަތަރު އަންހެން ކުދިން ދިގު ހެދުމުގައި ތިބެ "މަރުފަލި" ލަވައަށް ނަށަމުންދާ މަންޒަރެވެ. އެ ނެށުމުގައި ދެ ފިރިހެން ކުއްޖަކުވެސް ބައިވެރިވެ އެވެ. ފިރިހެން ކުދިން ތިބީ ކަޅު ގަމީހާއި ކަޅު ފޭލީގަ އެވެ.
"މަރުފަލި" ލަވައަށް ނެށުމުގެ ހަރަކާތްތައް ހުށަހަޅައިދެމުން ދިޔައީ ޒަމާނީ ނެށުމުގެ ވައްތަރެއް ކަމަށްވާ ފްރީ ސްޓައިލަށެވެ. މި ނެށުމުގައި ދިވެހިވަންތަ ގޮތްތަކަށް ވަނީ ބޮޑެތި އަދި ޒަމާނީ ބަދަލުތަކެއް ގެނަސްފަ އެވެ. މިއީ ދިވެހިންގެ ތެރޭގައިވެސް މަގުބޫލުކަން ހޯދާފައިވާ ފަންނުވެރި ނެށުމެކެވެ.
އެހެންނަމަވެސް ދިވެހިންގެ ގިނަ ބަޔަކަށް ކަމު ނުދިޔައީ ދިގު ހެދުން ލައިގެން ތިބެ ހުޅަނގު މީހުންގެ ވައްތަރުތަކެއް ޖެއްސުމުންނެވެ. އަނެއް ބަޔަކަށް ކަމު ނުދިޔައީ ދިވެހިވަންތަކަން ޕްރޮމޯޓު ކުރަންޖެހޭ ޕްލެޓްފޯމެއްގައި ހުޅަނގުގެ ނެށުމެއް ހުށަހަޅައިދިނުމުންނެވެ.
މީގެ ކުރިން އައިޓީބީ ފެއާގައި ނަށަނީ ދިވެހިވަންތަ ލަވަތަކަށެވެ. އާންމުކޮށް މިފަދަ ފެއާތަކުގައި އޮންނަނީ ބަނޑިޔާ ޖެހުމާއި، މާފަތި ނެށުން ނުވަތަ ދަނޑިޖެހުމެވެ. މީގެ ކުރިން ބޮޑުބެރު ގްރޫޕުތައްވެސް ވަނީ އެ ފެއާއަށް ގެންގޮސްފަ އެވެ. ބައެއް ދިވެހި ބޭންޑުތައް ފެއާއަށް ގޮސްވެސް ހުށަހަޅައިދެނީ ދިވެހި ލަވަތަކެވެ.
ދިގު ހެދުން ލައިގެންގޮސް ހަޑި ހާވަން މިނޫން ބަޔަކު ނުވީތަ ގެންދަން.. ލަދުން ބޯހަލާކު..
ދިގުހެދުމުގެވެސް އޭގެ އަސްލު ގެއްލުވާލާފަ. އަރިމަތިން ފަޅާފަހުރި ހެދުމެއް ލާހިތްވަންޏާ ދިވެހި ޤައުމީ ހެދުން އަސްލްކަށް ނުބެލިނަމަވެސް ވަރަށް ރަނގަޅުވީސް.