އިންތިޚާބުގައި ދެވަނަ ބުރަކަށް ގޮސްފިނަމަ، ޖޭޕީއާއެކު ކޯލިޝަން ހަދަން ހުށަހަޅާަަނަން: އިދިކޮޅު
ރިޔާސީ އިންތިޚާބުގައި ދެވަނަ ބުރަކަށް ގޮސްފިނަމަ، މިހާރު ސަރުކާރު ކޯލިޝަނުގައި ހިމެނޭ ޖޭޕީއާއެކު ކޯލިޝަން ހެދުމުގެ ފުރުސަތު ބޮޑު ކަމަށް ޕީއެންސީގެ ނައިބު ރައީސް އާދަމް ޝަރީފު އުމަރު ވިދާޅުވެއްޖެއެވެ.
ޖޭޕީން ވަނީ، މި އަހަރު ބާއްވާ ރިޔާސީ އިންތިޚާބުގައި ވާދަ ކުރަން ނިންމައިފައެވެ.
މި ނިންމުމާއެކުގައި، ރައީސް އިބްރާހީމް މުޙައްމަދު ޞާލިޙުއަށް އިންތިޚާބު ކާމިޔާބު ކުރެއްވުމުގެ ފުރުސަތު ކުޑަ ކަމަށް ސިޔާސީ މަސްރަހް ދިރާސާ ކުރާ ފަރާތްތަކުން ބުނެއެވެ.
އާދަމް ޝަރީފު ވިދާޅުވީ، ޕީޕީއެމުން ޔަޤީން ކުރަނީ، އިދިކޮޅު ލީޑަރު، ރައީސް ޔާމީނާއެކު، ރިޔާސީ އިންތިޚާބު އެއްބުރުން ކާމިޔާބު ކުރެވޭނެ ކަމަށެވެ. އަދި ދެވަނަ ބުރަކަށް ގޮސްފިނަމަ، ޖޭޕީއާއެކު ކޯލިޝަން ހެދުމުގެ ފުރުސަތު އެބައޮތް ކަމަށްވެސް ވިދާޅުވިއެވެ.
އޭނާ ވިދާޅުވީ، ޕީޕީއެމްއާ ޖޭޕީއަށް ބަލާއިރު، އެންމެ ބޮޑީ ޕީޕީއެމް ކަމަށާއި، ކޯލިޝަނެއްގައި އިސް ވާނީ ޕީޕީއެމް ކަމަށެވެ.
މި އަހަރުގެ ރިޔާސީ އިންތިޚާބު އޮންނާނީ ސެޕްޓެމްބަރު މަހުގެ ނުވަ ވަނަ ދުވަހުއެވެ.
މި އިންތިޚާބުގައި އިދިކޮޅުން ވާދަ ކުރައްވާނެ ކެންޑިޑޭޓެއް އަދި ކަށަވަރު ނުވި ނަމަވެސް، ރައީސް ޔާމީން މިނިވަންވާނެ ކަމަށް އިދިކޮޅު ސަޕޯޓަރުން އުއްމީދު ކުރެއެވެ.
