ރާއްޖޭގެ ދަރަނި 100 ބިލިއަނަށް އެރުން ގާތް: ސައީދުު
ރާއްޖޭގެ ދަރަނި 100 ބިލިއަނަށް އެރުން ގާތް ކަމަށް ކުރީގެ އިކޮނޮމިކް މިނިސްޓަރު އަދި މާވަރު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
ސައީދު ކުރެއްވި ޓްވީޓެއްގައި ވިދާޅުވީ ބޮޑު ވަބާއެއް ތެރޭ ދުނިޔޭގެ އިގްތިސާދު އިނދަ ޖެހިފައި ވަނިކޮށް ރާއްޖޭގެ ސިޔާދަތަށް ނުރައްކާވާ މިންވަރަށް ގައުމު ދަރުވާލުމަކީ ޒިންމާދާރުކަމުގެ ކަންފުޅެއް ވެސް ނެތުން ކަމަށެވެ.
"ރާއްޖޭގެ ދަރަނި 100 ބިލިއަނަށް އެރުން ގާތް. ރައީސް ސޯލިހާއި، ރައީސް ނަޝީދު މިހާރު ދަރަންޏަށް ކަންބޮޑު ނުވަނީތޯ" ސައީދު ވިދާޅުވިއެވެ.
ސައީދު މިހެން ވިދާޅުވެފައިވާއިރު، އިންޑިއާ އިން އިއްޔެ ވަނީ ރާއްޖެއަށް ގިނަ އެހީތަކެއް ދިނުމަށް އެއްބަސް ވެފައެވެ.
އެގޮތުން ވިލިމާލެ-ތިލަފުށި ބްރިޖު އަޅަން 500 މިލިއަން ޑޮލަރާއި ބަޖެޓް ސަޕޯޓުގެ ގޮތުގައި 250 މިލިއަން ޑޮލަރާއި، ރާއްޖެއަށް ބޭނުންވާ ޒަރޫރީ ބާވަތްތަކުގެ ކޯޓާ އާކޮށްދިނުމުގެ އިތުރުން އިންޑިއާގެ ކްރެޑިޓް ލައިންގެ ތެރެއިން ރާއްޖޭގައި ބޮޑު ހަތް މަޝްރޫއެއް ހިންގުމަށް ވަނީ އެއްބަސް ވެފައެވެ.
