ނާޒިމްގެ ވަޢުދު: ހިޔާގެ ކުލި 4000އަށް ކުޑަ ކުރުން
މޯލްޑިވްސް ނެޝަނަލް ޕާޓީ (އެމްއެެންޕީ)ގެ ވެެރިކަމެއްގައި ހިޔާ މަޝްރޫއުގެ ދަށުން އަޅައިފައިވާ ފްލެޓްތަކުގެ ކުލި 4000 ރުފިޔާއަށް ކުޑަކުރާނެ ކަމަށް، އެ ޕާޓީގެ ރައީސް، މުޙައްމަދު ނާޒިމް ވިދާޅުވެއްޖެއެވެ.
މަޖިލީހުގެ ދަނގެތި ދާއިރާގެ މެމްބަރުކަން ވެސް ކުރައްވާ ނާޒިމް މިހެން ވިދާޅުވީ "ނާޒިމް ބުނަނީ ކީކޭ؟" މި ނަމުގައި ކްލަބް ހައުސްގައި ކުރިއަށް ގެންދިޔަ އިވެންޓުގައެވެ.
އެމްއެންޕީގެ ވެރިކަމެއްގައި ހިޔާ ފްލެޓްތަކުގެ ކުއްޔާ ގުޅޭގޮތުން ބައިވެރިއަކު ރޭ ކުރި ސުވާލަކަށް ޖަވާބު ދެއްވަމުން ނާޒިމް ވިދާޅުވީ އޭނާގެ ސަރުކާރެއްގައި ހިޔާ ފްލެޓްތަކުގެ ކުލި މަހަކު 4000 ރުފިޔާއަށް ކުޑަކުރައްވާނެ ކަމަށެވެ.
ނާޒިމް އިތުރަށް ވިދާޅުވީ، ހިޔާ ފްލެޓްތައް އެޅުމަށް ނަގައިފައިވާ ލޯނު ރީސްޓްރަކްޗާކޮށް، ފްލެޓްތަކުގެ ކުލި ކުޑަ ކުރެވޭނެ ކަމަށެވެ.
ހިޔާ ފްލެޓްތަކަށް މިހާރު މަހު ކުލީގެ ގޮތުގައި، މެއިންޓެނެސް ފީއާއެކު، ދައްކަން ޖެހެނީ 8500 ރުފިޔާއެވެ. މިއީ ބޮޑު އަދަދެއް ކަމަށް ބުނެ، ފްލެޓްގެ ކުލި ކުޑަ ކުރަން މީގެ ކުރިން އެތައް ފަހަރަކު ސަރުކާރަށް ގޮވައިލައިފައިވެއެވެ.
ރައީސް ޔާމީން އަބްދުލްޤައްޔޫމްގެ ސަރުކާރުން ނިންމަވައިފައި އޮތީ، ހިޔާ ފްލެޓްތައް 5600 ރުފިޔާއަށް ކުއްޔަށް ދިނުމަށެވެ.
