ގުރައިދޫ ބައި-އިލެކްޝަން: ކެމްޕޭނަށް ދައުލަތުގެ މުދާ ބޭނުންކުރާނަމަ އޭސީސީއަށް ހުށަހަޅަން ގޮވާލައިފި
ކެމްޕޭނަށް ދައުލަތުގެ މުދާ ބޭނުންކުރާނަމަ އެ މައްސަލަ އޭސީސީއަށް ހުށަހެޅުމަށް އިލެކްޝަންސް ކޮމިޝަންގެ ރައީސް ފުއާދު ތައުފީގް ވިދާޅުވެއްޖެއެވެ.
ފުއާދު ތައުފީގް މިފަދައިން ވިދާޅުވެފައިވަނީ ގުރައިދޫ ދާއިރާގެ އިންތިޚާބުގައި ދައުލަތުގެ މުދާ ބޭނުންކޮށްގެން ސަރުކާރުން ކެމްޕޭން ކުރާކަމަށް މާވަށު ދާއިރާގެ މެންބަރު މުހައްމަދު ސައީދު ކުރެއްވި ތުހުމަތާ ގުޅިގެންނެވެ. ސައީދު ވަނީ ކެމްޕޭންގައި ސަރުކާރު ކުންފުނި ތަކުގެ އެމްޑީން މަޤާމުގެ ދިފާއުގައި ދައުލަތުގެ މުދާ ބޭނުންކުރާ ކަމަށް ވިދާޅުވެފައެވެ.
އެކަމާ ގުޅިގެން ކުރެއްވި ޓްވީޓެއްގައި ފުއާދު ވިދާޅުވީ، އެއްވެސް ފަރާތަކުން ދައުލަތުގެ މުދާ ކެމްޕޭނަށް ބޭނުންކުރާނަމަ، އެކަންކަމުގެ ތަފްސީލީ މައުލޫމާތު ލިބެންހުރި ހެކިތަކާއެކު އެންޓި ކޮރަޕްޝަން ކޮމިޝަނަށް ހުށަހެޅުއްވުން ރަނގަޅުވާނެ ކަމަށެވެ.
ރައްޔިތުންގެ މަޖިލީހުގެ ގުރައިދޫ ދާއިރާގެ ގޮނޑީގެ ކެމްޕޭން ހުރިހާ ފަރާތްތަކަކުން ކުރަމުން އަންނައިރު، އިންތިޚާބު ބޭއްވުމަށް ހަމަޖެހިފައިވަނީ އޭޕްރިލް 15 ވަނަ ދުވަހުއެވެ. ގުރައިދޫ ދާއިރާގެ މަޖިލިސް ގޮނޑި ހުސްވީ އެ ދާއިރާގެ މެންބަރުގެ ގޮތުގައި ހުންނެވި އިބްރާހީމް ރިޒާ އަވަހާރަވުމާ ގުޅިގެންނެވެ.
މި އިންތިޚާބުގައި ވާދަކުރަނީ ތިން ކެންޑިޑޭޓުންނެވެ. އެގޮތުން ކެންޑިޑޭޓް ނަމްބަރު އެކެއް ލިބުނީ ޕީޕީއެމްގެ ޓިކެޓްގައި ވާދަކުރައްވާ އެދާއިރާގެ ކުރީގެ މެމްބަރު އިބްރާހީމް ރިޒާގެ ކޮއްކޮ، ޙުސައިން ރިޒާ އަށެވެ. ކެންޑިޑޭޓް ނަމްބަރު ދޭއް ލިބުނީ އެމްޑީޕީގެ ޓިކެޓުގައި ވާކުރާ އިބްރާހީމް ޝާޒް އަށް ކަމަށްވާއިރު ކެންޑިޑޭޓް ނަމްބަރު ތިނެއް ލިބުނީ އެމްއެންޕީން ވާދަކުރާ އަލީ އާރިފަށެވެ.
Ads by STO
