ރައީސް ޔާމީންގެ ސަޕޯޓަރުން މާޔޫސް ކުރުމަށް ކުރާމަސައްކަތް ކާމިޔާބެއް ނުވާނެ: އާދަމް ޝަރީފް އުމަރު
ރައީސް ޔާމީންގެ ސަޕޯޓަރުން މާޔޫސް ކުރުވުމުގެ ނިޔަތުގައި ކުރަމުން އަންނަ މަސައްކަތް ކާމިޔާބެއް ނުވާނެކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެއެވެ.
އާދަމް ޝަރީފު ވިދާޅުވީ ރައީސް ޔާމީން މިނިވަންކޮށް ޕީޕީއެމް ޕީއެންސީ ވެރިކަމަށް ގެނައުމަށްޓަކައި ކުރަން ޖެހޭ ކޮންމެ ކަމެއް، ދައްކަންޖެހޭ ކޮންމެވާހަކައެއް ދައްކާނެކަމަށެވެ.
"ޕާޓީ އާއި ލީޑަރޝިޕް ބައިބައިކޮށް، ރައީސް ޔާމީންގެ ސަޕޯޓަރުން މާޔޫސް ކުރުވުމުގެ ނިޔަތުގައި ކުރަމުންދާ މަސައްކަތް ކާމިޔާބެއް ނުވާނެ އިންޝާ ﷲ. ރައީސް ޔާމީން މިނިވަންކޮށް، ޕީޕީއެމް ޕީއެންސީ ވެރިކަމަށް ގެނައުމަށްޓަކައި ކުރަންޖެހޭ ކޮންމެ ކަމެއް، ދައްކަންޖެހޭ ކޮންމެ ވާހަކައެއް ދައްކާނަން! ސާބިތުކަމާއި އަޒުމާއެކު ދާނީ ކުރިއަށް" އާދަމް ޝަރީފް ވިދާޅުވިއެވެ.
އަންނަ ރިޔާސީ އިންތިހާބުގައި ޕީޕީއެމް ޕީއެންސީގެ ރިޔާސީ ޓިކެޓު ހަވާލުކޮށްފައިވަނީ ކުރީގެ ރައީސް އަބްދުﷲ ޔާމީނާއެވެ. އެހެންނަމަވެސް މަނީލޯންޑާ ކުރުމާއި ރިޝްވަތުގެ ކުށް ސާބިތުވެ އެމަނިކުފާނު ގެންދަވަނީ 11 އަހަރުގެ ޖަލު ޙުކުމެއް ތަންފީޒު ކުރައްވަމުންނެވެ.
އެހެންކަމުން އަންނަ ރިޔާސީ އިންތިޚާބުގައި އެމަނިކުފާނަށް ވާދަކުރެއްވިދާނެކަމާއި މެދު ވަނީ ސުވާލު އުފެދިފައެވެ.
